ILP siam turin ARN phût

Assam National Re­gister of Citizens (NRC) list-a chuang lote Assam aṭanga Mizorama an luh loh nan hnam dang Mizorama lut tur, temporary ILP siam turte hnenah Application Reference Number (ARN) an phût zel tawh.

Vairengte SDO (Civil) Isaac Lalrempuia chuan zawhna chhangin ILP siam turin ARN phut zel a nih tawh thu hi sawiin, "ARN enfiah chhûng a rei avangin temporary ILP siam chhung a rei tawh," a ti. ARN enfiah a nih avang hian lirtheite an ding rei ṭhin tih sawiin Isaac Lalrempuia chuan, "Mipuiin min hriatthiam a ngai. ARN phût a nih avang hian temporary ILP siam zat pawh a tlahniam a ni," a ti.

Vairengte SDO sawi danin, August 2019 chhung khan Vairengteah hian temporary ILP siamsak hnam dang 9,128 an awm a, September-ah chuan a tlakhniam hle rin a ni. Bairabi-a temporary ILP siamna hmunah pawh ARN an phût hnuah ILP siam zat an tlahniam nasa hle niin Bairabi SDC Timothy R Lalhmangaiha chuan zawhna chhangin a sawi.

Bairabi SDC sawi danin, August 2019 khan Bairabi-ah temporary ILP siamtir hnam dang 3,400 an awm a, ni khatah mi 100 aia tamin ILP an siamtir ang a ni. ARN phût a nih hnu chuan ni khatah ILP mi parukin an siamtir anga chhût a ni tawh thung.