Sorkarin mau chi buaipui chiam a tum lo - CM Zoramthanga

Chief minister Zoramthanga chuan, bamboo project-ah sorkarin mau/rua chi buaipui chiam an tum loh thu a sawi a; Lengpui Airport leh thlawhtheihna thlâwk chungchangah, chhuanlam awm thei zawng zawng a tawp theih nan airport chu siamṭhat vat tuma hmalak mek a nih thu a sawi bawk.

CM Zoramthanga hian nimin khan MNF pisa, Mizo Hnam Rûna inkhawmah thu sawiin, bamboo project chu miin ràlkhatah an tàwng nasa hle niin a sawi a, "Ka sawi chian duh chu, kuhva, sangha chi leh thil dang dangah sorkarin a chî kûi emaw, a chi siam lamah hma kan la ngai lo ang bawk hian, sorkarin kha lam kha (mau/rua chi) buaipui chiam kan tum lo," a ti.

Zoramthanga chuan, mau leh raw ṭiak chu a rate âwm tâwk siamin, phun nun theih âwm tâwk an nih hunah mimal kut aṭangin sorkarin a lei mai dawn nia sawiin, "Mau phun sawn theih tura a chíngtute kut thleng tur hian uluk taka dimdawi taka a thiam bikte’n buaipui a ngai a, thil hautak tham tak a ni," a ti a; chu'ngte avang chuan hmanhmawh leh hnawhsarum deuha thil tih zung zung theih a nih loh thu a sawi. 

CM Zoramthanga chuan, sorkar hmasaah Mizoram budget chu a chî-ah hmang loin an sem char char nia sawiin, "Chu chuan hmasawnna hnathawhna tur a dâl nasa hle. Tun sorkarah chuan hna thawk turin kan chhuak dawn. Láwm rual fehna tur kan duang fel vek tawh a, SEDP kengkawhtu tur board 14 duan a ni tawh. Kan budget hi chu a chî (state matching share)-a hmangin hna kan thawk dawn a ni," a ti.

Chief Minister chuan, tun hnaia Delhi-a a zinnaah minister leh secretary eng emaw zat a hmuh thu sawiin, "Mizoram sorkar kal dan turte hrilhin kan zu vaw dûp phawt a, department leh board tinte home work chu project siam a ni a, project siam chur chur se, a ṭul angin kan innawrpui ang," a ti.

Sorkar tana hna thawh har khawpin hna ruak hnawhkhah loh a awm nia sawiin, chu'ngte chu fimkhur taka hnawhkhah a ngaih thu a sawi bawk.