Union FPI minister Rameswar Teli-a'n NE SC-ST Conclave 2019 a hmanpui

Union minister of state for Food Processing Industries Rameswar Teli chuan Aizawl a rawn tlawh a, nimin khan Aijal Club-ah North East Scheduled Castes - Scheduled Tribes Entrepreneurs Conclave 2019 a hmanpui. Minister chuan, Mizoram ṭhalai, ei tur sawngbawl (food processing) lama bul ṭan duh tan a theih ang anga puih a inhuam thu a sawi.

Rameswar Teli chuan, Ministry of Food Proecessing Industries-in thla hnih/khat chhungin Mizoramah ṭhalaite tan ei tur sawngbawl lama bul ṭan duh, a tih dan tur hre si lote tan workshop/roadshow buatsaih ngei tum a nih thu a puang a ni.

Prime minister Narendra Modi-a'n India hmarchhak state hrang hrangah hmasawnna thleng se, eizawnna pung se, inkalpawhna ṭha se a duh thu sawiin Rameswar Teli chuan, "Hengte hi a taka a thlen ngei theih nan minister-te hi hmarchhakah an zin a, mipui leh state mamawhte hre turin thuràwn an pe ṭhin a ni," a ti.

Lok Sabha MP C Lalrosanga pawhin thu sawiin, Conclave chuan ṭhalaite ei tur sawngbawl lama eizawnna tur kawng kawhhmuhna lamah hma a sawntir ngei a beisei thu a sawi a; SC leh ST-te'n entrepreneurship lamah an kal fuha an hlawhtlin theih nan kaihruaitu leh kawng kawhhmuhtu an mamawh thu a sawi bawk.

Conclave hi Ministry of Micro, Small and Medium Entreprises hnuaia MSME Export Promotion Council buatsaih a ni a; MLA Dr Vanlalthlana, Industrial Development Board vice chairman C Ramhluna leh Commerce & Industries secretary R Lalramnghaka te pawh an tel.

Chawhma lamah entrepreneur-te tan business session neih niin, MSME Export Promotion Council, NEDFi, APEDA, SIDBI leh NSIC aṭangin inzirtirna leh inhrilhriatna hun hman a ni.