Mizorama ePoS hmasa ber hman ṭan a ni

Food, Civil Supplies & Consumer Affairs minister K Lalrinliana chuan nimin khan Zonuam Retailer-I kudam (fair price shop)-ah Electronic Point of Sale (ePoS) khawl hmanga ration lak theihna a hawng. ePoS hi Mizorama a hmasa ber a ni.

Sorkar thuchhuah tarlan danin, retailer-te dawra ePoS khawl bunin a tum ber chu, a dawng tur dik takin an chanpual (quota) dik tak a hun taka kim taka an dawn theih a ni a; mipui chanpual ration buhfai (leh state dangah chuan wheat, dal, etc.)-te a nihna tur ni lo a, a bothlau tur venna a ni bawk.

Minister K Lalrinliana chuan, retailer-te dawra ration khulna tura khawl bun (FPS automation) chu Ministry of Consumer Affairs, Food & Public Distribution leh National Informatics Centre (NIC) hmalakna a nih thu leh India ram pumpuia kalpui mek a nih thu a sawi a, "Retailer-te'n ePoS an hmang vek dawn a, mipuite'n quota khulh nan an kutzung thla (finger print) chuanna Aadhaar card leh ration card-te an thlun zawm vek a ngai tawh dawn a ni," a ti.

K Lalrinliana chuan, mipuite chu Aadhaar card leh ration card inzawmtir ngei turin a chah a, "Tun aṭangin ePoS khawlte chu retailer dawrah bun zel tum a ni a, September thla chhung hian Aizawl khawpuia ration dawr 149-ah bun zawh hman tum a ni," a ti a; tun dinhmunah Mizoram pumah ration (retailer) dawr 1,270 a awm mek thu leh Mizoram pumah ePoS chu hman tum a nih thu a sawi. Zonuam Retailer I-a ePoS hawnna inkhawm hman zawhah ePoS hmangin ration an khultir nghal a ni.