Corporation-a P&E leh chungchanga A ngaihdan P&E Minister-in a sawi

Power & Electricity (P&E) minister R Lalzirliana chuan, P&E department chu corporation-a dah chungchang chu a thuin a ṭha a, mahse, Mizoram angah chuan thingtlang lam hnualsuat a hlauh­awm thu a sawi.

Minister R Lalzirliana hian Thawhlehni khan P&E department-in Tuivamita Training Centre an buatsaih thar a hawnnaah thu sawiin, "P&E department corporation-a dah hi a thuin a ṭha a, mahse, Mizoram angah chuan thingtlang lam hnualsuat a hlauh­awm a, an hnufûm bik ang tih a hlauhawm; revenue an hmuh ṭhatna khawpuiahte chauh an bûr chat ang a, a bakah chuan an inthlahdah ang tih a venthawnawm a ni," a ti.

P&E department chu technical department pawimawh tak a nih angin, thawktute chu mahni inzir zel tura chahin Lalzirliana chuan, "Thil thiam sate ennawn loh chuan theihngilh emaw, inthlahdah emaw a awl thei a, chuvangin, hna thilah inennawn fo a ngai tih hriat a pawimawh hle," a ti a; P&E department-a thawkte chu mipui tana malsawmna ni zel turin a fuih.

R Lalzirliana chuan, P&E department-a thawkte chu rim takin mipui rawngbawl hna an thawk chungin sawiselna an tâwk ṭhin tih a sawi a; an hna chu tihsual emaw, inthlahdah emaw palha mahni bakah, mi dangin nunna an chân theihna a nih avangin, engkimah fimkhur hle a ṭul thu a sawi bawk.

P&E department Training Centre hi Tuivamita P&E department ram chhunga awm a ni a, sub-station building hlui chei ṭhat niin, chei ṭhat nan cheng nuai 44.59 sên a ni. Training Centre hawn rual hian, training programme hawn nghal a ni a, Mizorama P&E division awm zawng zawng 24 aṭangin junior engineer 24 tan training buatsaih a ni.