PUC-ah Computer Application Centre hawng

Pachhunga University College (PUC)-a Computer Application Centre din thar chu September 3, Thawhlehni tlai khan Higher & Technical Education (HTE) minister Dr R Lalthangliana'n a hawng.

Minister R Lalthangliana chuan, PUC chu Mizorama college zingah National Assessment and Accreditation Council hnuaia endiknaa ti ṭha ber a ni tih sawiin, university result hrang hranga ti ṭha zual zinga PUC zirlaite an ṭhahnem thin chu lawmawm a tih thu a sawi a, "Hna hrang hrang laknaah computer application thiam phût tel a ni ta fo a, computer zirna college PUC-a hawn a ni ta hi a lawmawm hle a ni," a ti.

PUC Computer Application Centre hawnna inkhawm hi PUC principal Dr Tawnenga'n a kaihruai a, course coordinator Dr LP Lalduhawma'n report a pe a; PUC-a assistant professor Dr Vanlalthlana, MLA leh PUC zirtirtu leh zirlaite an tel a ni. PUC Computer Application Centre-ah hian Diploma in Computer Application-I (DCA-1) certificate course zirna kalpui a ni dawn a, batch hmasa ber atan zirlai 64 lak a ni.