Dawrpui khawtlangin food truck din an phal lo Food truck neitute mangang, phalsak turin ngen

Aizawl khawpui chhung, Mahatma Gandhi lim bul (Assam Rifles Quarter Guard hnuai) kawngpui kual zau laiah hun eng emaw ti aṭang khan zan lama lirthei (truck tê) hmanga ei leh in tur zuar, food truck a awm ṭan a, pali an awm 

ṭhin. Chu'ng food truck palite chu September 2, 2019 khan Dawrpui Local Council chuan inzuar tawh lo turin an hriattir a, food truck neitute an mangang hle nia thu dawn a ni.

Kum 2018 aṭang khan Aizawl khawpuiah food truck a awm ṭan a, Mahatma Gandhi lim bul kawng kual zau lai bikah hian tun hnai thleng khan food truck hi an ding ṭhin. Zan lama inzuar an ni a, tun hnai bikah chuan khaw thim ṭan tirh aṭanga zan dar 11 thleng inhawn phalsak an ni a, dawrtu pawh an nei ṭha hle. Bawngkawn aṭanga Durtlang Leitan thlen chhoh hma kawng zau laiah tun hnai aṭang khan food truck pakhat a ding ṭhin bawk.

September 2, 2019 khan Dawrpui Local Council chuan an veng chhunga ding ṭhin Food Truck-te chu September thla aṭanga ding tawh lo turin an hriattir ta a ni. Dawrpui Local Council chairman Zosang­zuali leh secretary K Lalhmachhuana te hminga food truck neitute hnena hriattirna lehkha an pekah chuan, Mahatma Gandhi lim ep kawngpui síra zana food truck ding ṭhin chuan harsatna hrang hrang a thlen nia sawiin, Dawrpui khawtlang hruaitute Joint Committee vawi 36-nain a ngaimawh thu an tarlang a, "September 2019 aṭangin food truck-te hi Dawrpui veng chhungah ding tawh lo tura hriattir ni se, tiin a rél a. He kan thurèl hi min ngaih pawimawhsak turin kan inngenin kan inhriattir e," an ti.

Dawrpui khawtlangin food truck-te ding tawh lo tura an hriattir hian social media hrang hrangah sawi zui a hlawh hle a; mi tam zawk chuan zan lama food truck awm chu ṭha an tih thu leh din khapna thu chu an dem thu an au chhuahpui.

Dawrpui Local Council chairman Zosangzuali'n Vang­laini a hrilh danin, August 31, 2019 (Inrinni) zan khan food truck customer-te leh Dawrpui khawtlangin security duty an rawihte an intibuai a; a intibuaite bik erawh chu an inchingfel tawh. Intihbuaina chhuak chungchangah hian food truck neitute chuan an hriat ve loh thu leh an haw hnua thil thleng a nih an rin thu an sawi thung.

Dawrpui khawtlang thu

Dawrpui LC chairman Zosangzuali chuan, Mahatma Gandhi lim bula food truck-te dinna ṭhin chu an veng huam chhung a nih thu sawiin, "Veng chhung tan harsatna leh buaina a awm ṭhin a, hetiang hian thutlukna kan siam ta a ni," a ti a; food truck pali zingah buaina bul nia ngaih deuh bik a awm niin a sawi.

Zosangzuali chuan, din an phalsak loh hnuah food truck-te chuan ngaihdam an dil a, din phalsak leh tura ngenna lehkha an thlen tih sawiin, "Veng chhungah chhiat tawk an awm avang leh buaina hrang hrang avangin an dilna hi kan la ngaihtuah hman lo, engtikah nge Joint Committee hi kan neih leh ang tih sawi theih a ni rih lo. Lehkha a rawn luh miau avangin remchang hmasaah kan ngaihtuah ang," a ti.

Aizawl khawpui enkawltu Aizawl Municipal Corporation (AMC) commissioner Dr H Lal­thlangliana chuan, food truck-te hian AMC aṭangin inzawrh phalna (license) an la neih loh thu a sawii rualin, license pek tumin an buaipui mek thu a sawi.

Dr H Lalthlangliana chuan Vanglaini palai zawhna chhangin, "Food truck-te hian AMC aṭangin license an la nei lo a, mahse, license pek kan tum a, kan survey mek. Anni kher lo, khawpui chhung kawng sira thil zuarte hi AMC-a register vek tur an ni a, kan khawih tur huang chhunga awm an ni. Food truck zingah AMC-a license rawn dilte pawh an awm a, an vai erawh chuan an rawn dil lo," a ti.

Food truck zinga mi Justchill neitu Billy Lalhruaitluanga chuan Vanglaini palai zawhna chhangin, a tirah chuan an dinna chu Tuikual area nia an hriat avangin Tuikual khawtlang hruaitute hnenah din phalna an dil tih a sawi a, "A hnuah Dawrpui khawtlang hruaitute an lo kal a, dilna rawn siam rawh u, an tih angin dilna kan thehlut a, April 2020 thleng atan phalna min pe phawt a ni," a ti.

Billy Lalhruaitluanga chuan an food truck chu bank loan laa siam an nih thu sawiin, "Kan food truck hmang hian bank loan rûl mek kan ni a, rilru a buai phah hle," a ti a; anni mai bakah, ei tur an laknate pawhin an buai phah thu a sawi.

Zo Global food truck neitu Lalchhandama chuan, an food truck chu Mizoram sorkarin ṭhalaite mahni kea dinga eizawnna kawng a dappuina chi khat, NEDP hnuaia MEDMOC-in project inelna a buatsaih, Micro Startup Capital Competition paltlanga Planning department kaltlanga siam an nih thu a sawi a, "Sorkarin ṭhalaite eizawnna tur a dappui a, a remchan dan angin mahnia eizawnna siam tumte a puihna hmangin food truck hi kan buaipui ve a, nuam kan ti a, kan hlim hle. Tuna Dawrpui khawtlangin kan dinna ṭhina din an phal ta lo hian min ṭháwng em em a, kan awm zel dan turah kan bangbo rih hle," a ti.

Lalchhandama chuan, an tih ṭan tirh lamah chuan zanlai thlengte pawhin inhawn cháng an nei tih sawiin, "Khawtlangin dar 11 thleng bak inhawng lo turin min ti a, dar 11 bak kan hawng ngai lo, laklawh bika minute 10 vela dar 11 pelh erawh kan nei ve ang," a ti a; Dawrpui khawtlang hruaitute chuan an thutlukna siam tawh chu ngaihtuah nawn se an duh thu a sawi.

Zo Global neitu chuan, "Loan rulh reng ngai kan nih vangin kan tan zan khat din theih loh pawh a pawi em em a, mi tute emaw vanga kan eizawnna tihtawp a nih hlauh chuan kan hma lam hun a thim hle dawn a. Rilru zau tak púa kan eizawnna min tihtawpsak lo a, ruahmanna ṭha zawk min siamsak turin Dawrpui khawtlang kan ngen a ni," a ti.

Food truck neitu zinga mi Lallianzuala Varte chuan, intodelh duhin risk lain food truck an buaipui thu leh Pathian zarah an tluang a, mi pawhin an dawr ve nasat thu a sawi a; Dawrpui khawtlangin an dinna ṭhina ding tawh lo tura an hriattir chu hrehawm an tih thu sawiin, "Kan rilru a náin hrehawm kan ti tlang khawp mai. Ram hmasawn nan tlem azawng kan thawh ve anga kan inngaih laiin, harsatna thlentu anga ngaih kan ni zawk hi hrehawm kan ti a, kan hrethiam lo hle a ni," a ti.

Lallianzuala chuan, "Nupui fanau nei vek kan ni a, chhungkaw ei bél bera hmang kan ni hlawm. Aizawl khawpuia hmun lailí leh hmun zau leh rem, residence area hnaih lo, traffic tihbuai lohna tur ber nia ngaiin kan ding kan ding hlawm a ni," a ti a; food truck hnaivaia ruihhlo ti ṭhin leh KS awm ṭhina sawi chu food truck vanga awm ni loin, food truck awm hma pawha an awm khawmna ber pakhat nia an hriat thu a sawi.