MNF thuthlung chu 'Pathian leh kan ram tan' tih a ni a, Pathianin MNF mal a sawm - Zoramthanga
Chief minister Zoramthanga, MNF president ni bawk chuan, MNF thupui chu Pathian leh kan ram tan tih a ni a, Pathianin MNF chu mal a sawm a, hun harsa tak pal tlangin kum 60 an lo thing dawn ta, tiin a sawi a; Aizawl khawpui lailía awm Assam Rifles-te chu February thlaah Zokhawsangah insawn vek tura an nawr thu a sawi.
MNF President chuan nimin khan Ramhlun South YMA Hall-ah AMC ward no. IV campaign hawnna hun a hmanpuinaah thu sawiin, Mizoram tana Pathian remruat dan sawiin, "Mizo nationalism hi thisena baptist a duh avangin rambuaiah kan lut a ni. Pu Denga tih a ni lo a, Pu Chaliha thinlung a ti a tlat a, rambuaiah kan lut ta a ni," a ti a, ram a buai hnua Pathianin MNF a hruai chhuah dan a sawi.
MNF President chuan MLA inthlanah khan party dangte kohhran behchhan bikin an insawi a, "Nimahsela, Pathianin MNF tan hun a ruat avangin sorkar ngelnghet kan siam," a ti a, by election, VC/LC leh LADC inthlanah MNF chu chiang taka an chak chhunzawm thu a sawi.
"Aizawl khawpuia Assam Rifles-te chu an chhuak thuai dawn a ni," a ti a; Covid-19 avangin an insawn tur khaihlak mah se, kumin February thla chhunga chhuak fel vek tura an nawr thu leh za rual vel an insawn tawh thu a sawi a ni.
Zoramthanga chuan, AR hotute pawhin Zokhawsangah insawn an duh tawh hle nia sawiin, "An inbuatsaih mek a, keini sorkar lam pawh kan inbuatsaih mek. Aizawl mai ni lo, Mizoram hmun danga kan ram min chhuhtu sipaite pawh ûm chhuah vek kan tum a, hei hi Prime Minister leh Union Home Minister pawh ka sawipui tawh," a ti.
MNF sorkar hnuah MP inthlan an nei a, Election Model Code of Conduct-in rei tak a phuar tih sawiin Zoramthanga chuan, "A hnuah Covid-19 a lo lang leh a ni," a ti a, an sorkar hnathawh tak tak chu thla riat chauh a la nia a hriat thu a sawi.
Inkhawmah hian AMC Ward-IV atana MNF candidate Laltlanzova Khiangte pawhin thu a sawi a ni.