Kohhran leh NGO duh loh kan ti lo ang - Lal Thanhawla

Mizoram Pradesh Congress Committee (MPCC) president Dr Lal Thanhawla chuan, Congress party-in sor­karna an channaah reng reng kohhran leh tlawmngai pawlte duh loh chi rêng rêng an tih loh tur thu a sawi.

Aizawl District Cong­ress Committee (ADCC)-in Aizawl North-I & II huam chhunga mite tana nimina Lal Thanhawla Auditorium-a AMC inthlan thlir lâwkna inkhawm an buatsaihah Lal Thanhawla chuan, "Kohhran leh NGO duh loh chi reng reng eng mah Congress party-in sorkarna kan chan pawhin kan ti lo ang. Pathianin min enkawl danah leh min humnaah hian lawmthu kan sawi a ngai a ni," a ti.

Dr Lal Thanhawla chuan, Congress party-in state-ah sorkarna chang rih lo mah se, AMC inthlan tura an candidate-te chu ṭha tak tak vek an nih thu a sawi a, "An tlin ngei pawh ka ring," tiin, AMC inthlana candidate tur ṭha tak tak Pathianin a pek avangin lawmawm a tih thu a sawi.

MPCC PAC member PC Zoram Sangliana pawhin thu sawiin, MNF chu Aizawl mipui tibuaitu leh timangangtu an nih thu a sawi a, "Chhungkaw tin kan bawlhhlawhte chi lia min thliartir laiin, bawlhhlawh paihna hmunah chi hnih chauha thliar a nih avangin mipui kan buai thlâwn a ni. MNF hi Aizawl sorkar (AMC) engah mah ngai lotu an nihzia chu, hripui lêng kaihhnawih reng rengah ruling councillor chu sawi loh, Mayor tak ngial pawh telh loh a ni hian a tichiang hle a ni," a ti.

Inkhawmah hian AMC ward I-a Congress can­didate Lalawmpuia, ward II-a candidate V Lalrosanga, ward III-a candidate Mimi Lalhming­mawii Ralte leh ward IV-a candidate R Lallungawia te pawhin thu an sawi a ni.