AMC-ah hnehna kan chan ngei ka ring - ZPM Vice President

ZPM hruaitute chuan nimin khan AMC inthlan lo awm tur atana ward no. VII inbuatsaih dan an enpuia, ZPM vice president Dr Kenneth Chawngliana chuan AMC inthlan lo awm turah an party-in hnehna an chan ngei a rin thu a sawi.

Dr Kenneth Chawng­liana chuan AMC in­thlan lo awm tur atan an party inbuatsaihna a ṭha thawkhat tih sawiin, "Candidate kan nei ṭha a, Pathian leh mipui zarah hnehna kan chan ngei ka ring," a ti. 

AMC inthlanah sym­bol atan 'Ni Chhhuak' an hman dawn thu sawiin ZPM Vice President chuan, "ZPM hi ECI-ah in register tawh mah ila, symbol nghet nei tur chuan recognition kan nih leh a la ngai," a ti a, recognition an la nih loh avangin AMC inthlanah symbol nghet nei lote tana hman tur zinga mi an hman a ngaih thu a sawi.

Dr Kenneth Chawng­liana chuan MLA inthlana an symbol hman ‘lukhum’ kha hman nawn leh an duh tih sawiin, "AMC free symbol-ah a tel ve lo a, kan hotuten theihtawp chhuahin hman leh theih dan dapin thuneitute an bia a, a tawpah chuan cabi­net thutlukna a ngai tih a ni. MNF sorkar hian min tihhlawhtlinsak duh lo," a ti. 

Inkhawmah hian ZPM general secretary B Lalchhanzova leh ward no. VII-a an candidate H Lalfakmawiate pawhin thu an sawi.