MNF-in by-election an la ngaihtuah lo Mipuiin sorkar an ring tâwk - MNF Vice President
MNF vice president Lalthlengliana chuan nimin khan Serchhip Press Club-ah thuthar thehdarhtute a kâwm a; Serchhip Assembly bial by-election neih tur chungchang ngaihtuahin an la ṭhutkhawm loh thu sawiin, "MNF sorkar mipuiin an ring tâwk," a ti.
Lalthlengliana chuan MNF sorkar hmalakna hrang hrang sawiin, "MNF sorkar thil tih ṭhat hrang hrang avang hian Pu Zoramthanga kaihhruai sorkar hi mipuiin an ring tâwk. Hengte avang hian VC inthlanah 59% leh LC-ah 86% kan la a ni. LADC inthlanah pawh seat awm zawng zawng 25-ah seat 20 zet MNF-in kan la thei. Kha chen sorkar tawh Congress chuan independent seat lâk zat pawh an la pha lo," a ti.
Zawhna chhángin MNF Vice President chuan, MLA by-election chu bial ruak puan a nih aṭanga thla ruk chhunga neih tur a nih thu sawiin, "AMC inthlanna neih a ni dawn a, chumi hnuah chuan Assembly session a la awm leh dawn. Serchhip bial by-election neih tur chungchang ngaihtuahin kan la ṭhukhawm lo," a ti a, by-election atan an party chu an hmanhmawh loh thu a sawi.
MNF ticket-a ding tura a hming sawi a awm chungchangah Lalthlengliana chuan, "Kum 2018-a General Election dawn khan bial ṭhenkhat chuan an biala ding turin min sáwm ve a, ka nupui dam lohna avangin ka ding lo a, a boral takah phei chuan hetiang lam ngaihtuahna ka nei lo a, MLA nih châkna pawh ka nei lêm lo. Kum 2023 MLA inthlanpuia kan party sorkartir leh hi ka tum ber a ni," a ti.
MNF Vice President chuan, MLA aṭanga bàn tâk Serchhip bialtu MLA hlui Lalduhoma chungchang sawiin, "Mi tam takin an khawngaih a, kei pawhin ka khawngaih. Mite'n khawngaihthlak an tih fo ṭhin chu dan bawhchhe lui tlat ṭhinte hi an ni," a ti a; Lalduhoma chu India ram pumpuiah Anti Defection Law dana vawi hnih bàntir hmasak ber a nih thu a sawi.
Independent candidate danglam an awm ngai lo tih sawiin MNF Vice President chuan, "Independent candidate ni si khan ZPM tan sengkhawm hna a thawk zel a, a lâwm luttu berah a ṭang a ni. He party-ah hian membership fee a pek leh pek loh lam a ni lo a, a chêt dan hi ZPM party ngialngan dik tak a nih avangin Supreme Court thutlukna awm tawh sa angin paihthlak a ni zawk," a ti.