Thisen petute chungah AVBD an lawm Thisen pek uar zel zui turin an sáwm

Association for Voluntary Blood Donation (AVBD) chuan thuchhuah siamin, kum 2020 chhunga Mizoram thisen petu zawng zawng chungah lawmthu an sawi tih an tarlang a; thisen pek uar zel turin Mizo ṭhalaite an sáwm nghal. 

AVBD chuan, kum 2020 chhunga an hmalaknate tarlangin, an hmalakna hrang hranga thlâwp tlattu Mizoram sorkar hnuaia mite leh pawl leh mimal zawng zawng chungah an lawm thu an sawi a ni.

Sorkar department, NSS Cell leh unit hrang hrang, kohhran ṭhalai pawl, YMA, political party leh pawl dangte chu thisen pek uar zual zel tura sáwmin AVBD chuan, "Pawl hming mai bakah, mimala thisen pek uar zel turin kan inngen a ni. Mizorama thisen mamawh zawng zawng hi rulh ngai a nih loh nan leh a thlâwna pek a nih vek theih nan leh, thisen mamawhte'n a hun taka an dawn zat zat theih nan i ṭang tlang ang u," an ti.

AVBD chuan kum 2020 chhunga an hmalakna ṭhenkhat an tarlang. February 14-a Valentine's Day puala thisen pek rûnpui an huaihawtah Mizorama blood bank zawng zawngah thisen unit 1,131 pek a ni a, Mizorama ni khat thil thua thisen pek a tam ber ṭum a ni. Valentine's Day puala thisen pek hi kum 2010-ah ṭanin, kum tin neih zui a ni a, ṭan a nih aṭanga kum 2020 thlengin thisen unit 7,342 pek a ni tawh.

March thla chawhnu lam aṭanga total lockdown puan karah thisen pek a chatlak loh nan hma lain, thisen pe turin pawl eng emaw zat an sâwm a, an sawmna tihlawh­tlinga lockdown chhunga thisen pek zat chu unit 2,349 a ni. 

NHM leh MSACS-te nen ṭang­hoin August 10, 2020-ah PUC Seminar Hall-ah thisen petu pawlte chawimawina hun an buatsaih a, thisen pe ṭha pawlte hnenah chawimawina an hlan. December 1-31 chhungin Aizawl leh district hrang hranga blood bank-ah 'Krismas pual thisen pek rûnpui' an huaihawt bawk a, chumi chhunga Mizorama thisen pek zat chu unit 1,942 a ni.