Minister leh MLA-te hna ber chu CM leh minister 1 inzui thlîr a ni - MPCC Treasurer

Mizoram Pradesh Congress Committee (MPCC) treasurer Zodin­tluanga Ralte, Congress Legislature Party (CLP) leader chuan, MNF sorkarah minister leh MNF MLA-te hna ber chu Chief Minister leh minister pakhat inzui thlìr a nih thu a sawi.

Nimina Falkland Venga AMC ward no. VII campaign hawnna inkhawmah thu sawiin Zodintluanga Ralte chuan, MNF sorkarah minister leh an MLA-te tan hmasawnna hna thawk tak tak tura chêt theih a ni lo tih a sawi a, "An hna chu minister pakhat leh Chief Minister inzui lo thlir a ni mai. CM hnathawh ber pawh minister pakhat uchuak taka fakmawi leh kalna tur a tih apianga kal a ni," a ti.

MPCC Treasurer chuan, MNF sorkar chu Mizo­­ram leh Aizawl khaw­pui mipui chawk buaituah puhin, "Mirethei leh harsate dinhmun ngaih­tuahna an nei lo. Aizawl Bazarpui, mirethei ni tina eizawngte an insawn chhuahna tur ngaihtuahsak lâwk loin an duhsak zawngte'n hlâwkna an chan thuai theihna turin an ṭhiahsak tawp a ni," a ti a, mi tam takin an eizawnna an chàn mek thu a sawi.

MNF sorkarah ṭhalai­te hmabak a thim nia sawi­in Zodintluanga chuan, "Lehkha zirin awm­zia a nei lo. Congress sorkar­ah MPSC-in ṭhalai lehkha­thiamte an thiamna hmuna an thawh theih nan fel takin an la ṭhin. MNF sorkarin MPSC a suasam nasat avangin hna lak dan a mumal lo. Minister-te'n an tunute sorkarah induhsakna uchuak tak neih tumin lehkha ziak leh phone message hmangin thu­neitute an hrilh ṭhin a ni," a ti.