COVID-19: Mizoram dinhmun Hripui vei mi 3 hmuh belh a ni

January 27, Nilaini khan Mizoramah Covid-19 vei mi pathum hmuh chhuah a ni a, an zingah Mizoram chhunga kái pakhat a awm. Nimin khan hripui laka fihlîm tawh mi pahnih chhuahtir an ni.

Covid-19 vei Nilainia hmuh chhuah pathumte chu TrueNAT-PCR hmanga hmuh mi pahnih leh Rapid Antigen Test (RAT) hmanga hmuh mi pakhat an ni a; ZMC laboratory-a swab sample test zingah hripui vei hmuh a ni lo.

Covid-19 laka fihlîm tawh nimina chhuahtir mi pahnih chu Lengpui CCC leh Lawngtlai CCC aṭanga chhuakte an ni.

Mizorama Covid-19 vei hmuh chhuah tawh chu mi 4,362 an ni a, mipa 3,192 leh hmeichhia 1,170 an ni. Nimin tlai dar 5 thleng khan mi 4,313 (98.88%) chhuah­tir an ni tawh a, mi pakua (0.21%) thi tawhin, enkawl mek mi 40 (0.91%) an awm.

January 27, Nilaini khan ZMC labo­ratory-ah swab sample 158, TrueNAT-PCR hmangin district pariatah sample 136 leh RAT hmangin district 11-ah sample 819 endik a ni a; sample endik zawng zawng chu 1,113 niin, chu'ng aṭanga Covid-19 vei hmuh chhuah mi pathum chu 0.26% a ni.

Sorkar thuchhuah tarlan danin, Thawhlehnia TrueNAT-PCR hmanga hripui vei hmuh chhuah mi pahnihte chu BSF mi leh sa, hnam dang mipa ve ve an ni a, khung hran lai, symptom nei lo an ni. RAT hmanga hmuh chhuah awmchhun chu Lawngtlai khaw mi, Aizawla hmuh chhuah a ni a, tualchhunga hri kái niin, a kàina hriat a ni lo.

January 28, 2021 thlenga Mizorama swab sample endik tawh zat chu 2,04,372 a ni a, chu'ng aṭanga Covid-19 positive mi 4,361 chu 2.13% a ni. Hripui vei hmuh tawh zinga mi 2,061 chu Mizoram chhunga kái an ni a, mi 2,301 chu Mizoram páwn aṭanga an rawn luh hnua hmuh chhuah an ni thung.

BSF, Lunglei - 2: Meltea awm 131 Bn BSF mi leh sa mipa kum 45 & 57, tun hnaia state páwn aṭanga rawn lut, quarantine facility-a awm lai, symptom nei lo ve ve.

Aizawl - 1: Lawngtlai khaw mi hmeichhia kum 34, Aizawla private hospital-a inentir tura a kalnaa hmuh chhuah, hri a kàina hriat loh, symptom nei lo.