KHAWTHLIR

Siaha khawpuia village council zawng zawng, self help group, zirna-in leh Siaha mipui aṭangin Open Defecation Free+ self declaration dawn tawh a nih angin, nimin khan Siaha khawpui chu páwn lama inthiar awm lohna open defecation free+ (ODF+) atan puan a ni. 

Kolasib district Local Administration Officer (DLAO) chuan nimin khan VC seal chungchangah thuchhuah a siam a; an district chhunga VC-te seal chu siamtirna hmun bik a awm a, uluk taka duan leh chhinchhiahna siam vek a nih avangin, seal lem nia rinhlelhte chu DLAO hnenah entira zawh chian theih reng a nih thu a tarlang.

Hachhek bialtu MLA Lalrindika Ralte chuan a bial chhung, Bajirung khua chu MLA fund aṭangin khelmual a laihsak. Khelmual thar lawmna atan hian nimin khan Bajirung khua chuan football tournament an siam a ni. 

Nehru Yuva Kendra, Lunglei buatsaihin nimin khan Lunglei district-a VC leh Village Water Sanitation Committee member-te pualin PHE conference hall-ah 'Catch the rain' tih thupui zirhona leh Jal Jeevan Mission & Swachh Bharat Mission-Gramin Phase-II inhrilh­fiahna hun hman a ni. 

Ralvawng Khawchhuak Insuihkhawm Committee buatsaih, 'Lalnu Ropuiliani phûmna Ralvawngah' tih lehkhabu chu nimin khan MJA Gen. Hqrs president Zonunsanga Khiangte-in Aizawl Press Club-ah a tlangzarh. Lehkhabuah hian Ropuiliani phûmna hmun Rálvâwng a nihzia tarlanna ṭan chhan hrang hrang ziah a ni.

Minister Dr R Lalthangliana chuan nimin khan a bial chhung, Hnahthial khuaa sorkar pisa hrang hrang a tlawh a, sorkar hotute a kâwm. Minister hi Industrial Development Board vice chairman C Ramhluna'n a ṭawiawm.