MPYCC-in minister Ruatkima an hêkna Bawhzui chak turin Governor an ngen

Mizoram Pradesh Youth Congress Committee (MPYCC) chuan nimin khan Governor PS Sreedharan Pillai hnenah, minister of state Lalruatkima Facebook account nia hriat aṭanga Constitution of India kaihlek (edited) post chungchanga Cyber Crime-a FIR an thehluh chu chak zawka ûm zui turin an ngen.

MPYCC-in Larsap hnena an lehkha thehluha tarlan dan chuan, Lalruatkima nia rin chuan India ram danpui kaileka Mizoram-Assam ramri chhinchhiahna chu Bengal Eastern Frontier Regulation Act, 1875 a ni, tiin Facebook group pakhata post-ah a comment a ni. Hei hi Congress ṭhalaite chuan India ram danpui tihbawrhbànna a ni tiin, nikum khan Mizoram Police-a Cyber Crime PS-ah an zualko a ni.

India sorkar leh MNF-te'n kum 1986-a inremna an siamah, Mizoram leh Assam inrinaa an pawm chu North Eastern Areas (Reorganisation) Act, 1971 a ni tih an tarlang a, chu chu India danpuiah tarlan a ni. Hemi chungchang Wikipedia-a tarlan chu dik lo taka khawih danglamin, Facebook-a profile 'Rka Ruatkima' tia account siam, minister of state Lalruatkima ni ngeia an hriat chuan a tidanglam a, Mizoram-Assam ramri, MNF leh India sorkarin an pawm chu Bengal Eastern Frontier Regulation Act, 1875 a ni tiin post comment nan a hmang a ni.

MPYCC vice president F Lalhmangaiha chuan, India ram danpui zah lohna leh diriamna a thlen hnuah pawh hnu chhui a muang hlea an hriat thu leh pawi an tih thu a sawi a, "Rang zawka finfiah a, a mawhphurtu hrem ngei kan phût tlat a ni," a ti.

MPYCC-te lehkha thehluh hi Governor aiawhin K Lalthawmmawia'n a dawng a ni, President, Union Home Minister leh Chief Election Commission of India hnenah an thawn tel a ni.