CM hoin SEDP board 3 hmalakna sawiho
Chief minister Zoramthanga chuan January 27, Nilaini khan CMO Cabinet meeting room-ah SEDP board pathum - Health & Family Welfare Board, Higher & Technical Education Board leh Commerce & Industries Board-te a ṭhutkhawmpui a; an hmalakna, hmachhawp leh harsatnate a sawipui.
CM Zoramthanga chuan, Health & Family Welfare Board hnuaia thingtlanga inenkawlna ṭha zawk siam a pawimawh thu leh PHC tihchangtlun chu ngaih pawimawh hmasak ni se a duh thu a sawi.
Ṭhutkhawmah hian HTE Board kaihhnawihah, technical lam zirna-in tihchangtlunna tura mamawh te, college hrang hrang accreditation inspection chungchang te, thawktu indaih lohna leh thil pawimawh dangte sawiho a ni.
Economy tihhmasawnna atana thing leh mau, lei hnuai hausakna leh a dangte hman ṭangkaina tura ruahmanna siam tawhte Commerce & Industries Board hotute nen sawiho a ni a; state páwn aṭanga investment ti duhte tan kalphung awlsam zawk leh remchanna siam te, thing leh maua innghat industry siam chungchangte sawiho a ni.
Ṭhutkhawmah hian board pathuma chairman minister Dr R Lalthangliana, HFW Board vice chairman Dr ZR Thiamsanga, HTE Board vice chairman Dr Vanlalṭanpuia, C&I Board vice chairman C Ramhluna leh member dangte tel.