MNF-in 'lungphùm politics' an hmatheh - ZPM Ṭhalai

ZPM Ṭhalai chuan nimin khan thuchhuah siamin, AMC inthlan awm turah MNF party-in 'lungphùm politics' an hmatheh tih an tarlang a; mipui bum tuma an hmanhlel ṭhin chu sim tawh turin MNF party an ngen.

Kum 2018 MLA inthlanpui neih dawnah MNF party chuan SEDP-a cheng vbc. 1,000 dah te, SEDP hmanga cheng nuai thum aia tlem lo sem leh NLUP dawng tawhte pawh pe ve tur angin mipui an tiam tih sawiin ZPM Ṭhalai chuan, "MP inthlan dawna CAB thláwp lo tura intiamtu MNF party bawk khan AMC inthlan dawnah 'lungphùm politics' an rawn hmatheh leh ta," an ti.

ZPM ṭhalaite chuan, lungphùm politics-ah CM Zoramthanga leh Sports minister Robert Romawia Royte te chu a phusa ber pawl an nih thu sawiin, "An ze ngai chhuahin inthlan dawnah naménloin an intiam leh ta a ni," an ti a; inthlan dawna an intiam leh vak vak chu mipui hmuhsitnaa an ngaih thu an sawi.

ZPM Ṭhalai chuan, inthlan hma leh inthlan hnua politician-te thusawi leh chêt dan inthlak ṭhin chu lo chîk ṭhin turin Mizoram mipui an ngen a, "Inthlan hma leh inthlan hnua an thusawi leh thutiam danglam ṭhin party vote nawn hi mipuite'n kan ba lo," an ti.

MNF sorkarin lungphùm an phùm zawng zawng chu an dâwt sawi hliahkhuhna tura dâwt dang an sawi lehna hmanrua a nih thu sawiin, ZPM Ṭhalai chuan, ram hruaitu berte mipui bum tuma an hmanhlel chu sim turin an ngen a ni.