Assam Rifles-in ruihhlo an man

Assam Rifles-te leh Excise & Narcotics enforcement-te chuan January 27, Nilaini khan Beraw lui veng, Zemabawkah heroin gram 107, ram dang meizial Essay Gold báwm 5,000 leh Dagon beer can 72 an man.

AR thuchhuah tarlan danin, heroin an man chu tualchhunga hralhna angin Rs. 42,80,000 man niin, Essay Gold chu Rs. 12,50,000 man leh Dagon beer chu Rs. 36,000 man a ni a; a vaiin Rs. 55,66,000 man a ni. A kaihhnawihah mi pahnih an man bawk.

Assam Rifles 23 Sector DIG Brig. Digvijay Singh chuan nimin khan Champhaia Rosemary Children Home a tlawh a, thawktute leh naupang awmte nen an inkâwm. DIG chuan, AR-in an theih ang angin chhawmdawlna an pek tur thu leh an mamawh zualpuite an pek tur thu a sawi a ni.