Kângmei vèn dan tur sawiho a ni
Kolasib, Serchhip, Lawngtlai leh Hnahthialah nimin khan district level Committee on Fire Prevention-te an ṭhu a, an district-a kângmei vên kawnga hmalak dan tur hrang hrang an rêl.
February 8-13, 2021 chhungin Mizoramah kângmei vèn hapta - Fire Prevention Week hman tur a ni a, thupui chu 'Kângmei tichhuak lo turin mi tin i fimkhur ang u' tih a ni. Mizoram sorkar chuan lo/huan/leipui hâl hun hnuhnung atan March 15, 2021 a lo bithliah tawh a ni.
Kolasib-ah chuan DC conference hall-ah additional DC Lallawmawma kaihhruaiin Fire Prevention Week hman dan tur an rêl a; hapta chhungin in kâng leh ram kâng a thlen loh nan fimkhurna kawng hrang hrang uar zawka inzirtir te, thuthar lakhawmtute leh digital media platform-te chu kângmei laka fimkhurna inzirtirna kawngah hman ṭangkai te, sorkar department leh tlawmngai pawlte chu thawhpuia sàwmte an rél a ni.
Kângmei laka fimkhurna kalpui kawnga veng/khua ti ṭha thlan chhuah ni se, pakhatna hnenah Rs. 50,000, pahnihna hnenah Rs. 30,000 leh pathumna hnenah Rs. 20,000 pek ni se, an ti.
Serchhipah chuan chairman Kumar Abhishek, bawrhsap hoin DC meeting hall-ah an ṭhukhawm a; Fire Prevention Week hawn ní-ah kum 2020 chhunga ram kâng vên kawnga ti ṭha khuate hnenah lawmman pek an rêl.
Khaw tina Village Level Fire Prevention Committee-te chu nasa zawka ram kâng vên kawnga inhmang tur leh inzirtirna pawh an khuaah nasa lehzuala lo kalpui ṭheuh tura hriattir ni se, an ti bawk.
Lawngtlaiah chuan DC conference hall-ah additional DC Marilyn Rualzakhumthangi hoin an ṭhu a; Fire Prevention Week hman tur chu February 8 chawhma dar 11-ah DC conference hall-ah hawnna inkhawm buatsaih an rél.
Kum 2020-a kângmei véng ṭha khua thlante hnenah 'Village Fire Prevention Award 2020' hlan ni se an ti a; ram kâng vênnaa hmalakna atan MGNREGA hnuaia inhlawhna sum dah te, kângmei vên chungchanga mipui zirtirna a tam thei ang bera puan leh video tawi buatsaihte an rél. Lo/leipui/huan hâl turte chu an khaw VC hnenah inhriattir a, a ṭul anga vênpui dan ngaihtuah ni se, an ti bawk.
Hnahthialah chuan bawrhsap Vanlalmawia, hoin an ṭhukhawm a; Bawrhsap chuan, Hnahthial district-ah DFO an la neih loh avangin forest lam kaihhnawihah rorel a buaithlakna chin a awm thu a sawi.
Ṭhutkhawmah hian Fire Prevention Week hawnna hun hman dan tur tlangpui tur an duang a; kângmei veng ṭha khua endiktu leh thlangtu tur an ruat. Talk show buatsaih te, minute khat awh video clip insiamsiak buatsaih te, kohhran tina chhiar chhuah tur lehkha pekte an rél bawk.