Health Minister leh AVBD hruaitute'n Thisen peka hmasawn dan tur sawiho
Association for Voluntary Blood Donation (AVBD) hruaitute chuan January 12, Inrinni zing khan Health & Family Welfare minister Dr R Lalthangliana hnenah Mizorama thisen pek chungchang leh a kaihhawih thil chi hrang hrang an thlen a, hmalak zel dan tur an sawiho.
Health Minister hi AVBD president C Lalnunnema hoin office bearer-te'n an hmu a; chumi chungchangah chuan AVBD chuan thuchhuah siamin, a thlawna thisen pek (voluntary blood donation) a pun theihna tura Health Minister inhuam dan an hriatin, lawmawm an tih thu an tarlang.
AVBD hruaitute chuan Health Minister hnenah hian, Aizawl Civil Hospital leh district hospital dang ṭhenkhat blood bank-a thawktu indaih loh chungchang thlenin, "Pâwl anga thisen pe duh ṭhahnem tak awm mah se, thawktu indaih lohna vangin Aizawl Civil Hospital Blood Bank-ah thisen pekna hun chang lo an awm ṭhin a ni," an ti a; doctor leh thawktu dang dah belh dan ngaihtuahpui turin an ngen.
Hemi chungchangah hian minister Dr R Lalthangliana chuan, mumal zawkin lehkha siama thehlut turin AVBD hruaitute a lo râwn a; a ṭul anga a lo bawhzui tur thuin a chhang a ni.
Health Minister chuan, thisen hmangtute aṭanga blood processing fee lak tihtawp a nih vanga blood donation atana sum mamawh angte state budget-a dah tum a nih thu a sawi bakah, voluntary blood donation chungchanga hmalakna atana budget-a sum dah dan kawng zawn ṭha a tih thu a sawi bawk.
Aizawl Civil Hospital blood bank-ah thisen dah khawl sa a tlem avangin Health Minister chuan MNF party ṭhalaite tun kar chhunga blood donation camp huaihawt turin a ngen a, a ngenna hi MNYF pawhin tihhlawhtlin nghal an tum. Health Minister hmalaknaah hian AVBD chuan lawmthu an sawi a ni.