Reiek tlang tihfai hnatlang neih a ni

Reiek Village Council leh Reiek Tlang Tourism Development Board chuan January 12, Inrinni khan Reiek tlang a thianghlim nan leh kângmei laka a him theih nan bawlhhlawh thenfai leh kângmei chhuah theihna hmun sâmfai hnatlang an huaihawt a, mi 100 chuang an thawk chhuak.

Thu dawn danin, Reiek V/C kaih­hruaina hnuaiah an khuaa YMA, MUP, MHIP leh MZP-te chuan kum 2018 khan Reiek Tlang Tourism Development  Board an din a; Reiek tlang leh a chhehvel tihchangtlung hna an buaipui a ni. Tlang luhnaah gate siamin duty an indah a, chawlhkar tin mi 2,000 velin an tlawh ṭhin niin an tarlang.

Reiek tlang thlen hma deuhah naupang intihhlim na hmun (park) siamin, zip line, climbing wall leh thil chi hrang hrang an siam mek a, hawn thuai an tum. Zokhua pawh an siam mek a, hawn thuai beisei a ni bawk.

Reiek khawtlang chuan, Reiek tlang  tlawhtute chu kângmei laka fimkhur tur te, kângmei laka tlang venpui tur leh tlang tibawhhlawhtu ni lo turin an ngen a ni.