Larsapin Riangvaite Rûn a tlawh

Governor Kummanam Rajasekharan chuan January 12, Inrinni khan Seling-a Samaritan Riang­vai Run a tlawh a, Project Pushpak BRO Wives Welfare Association (BROWWA)-in Charity Programme cum Medical Camp an buatsaih a hmanpui nghal.

Larsap chuan home enkawltute chungah lawmthu sawiin, "Mirethei te, pachhia te, riangvaite leh ṭanpui ngaite ṭanpui hi kan zavaia hna a ni. Ṭhalaite tan phei chuan ṭanpui ngaite ṭanpui aia thil intihhmuh tura  tha zawk a awm chuang lo," a ti a; sor­karin Accessible India Campaign kaltlangin mi chanhai, riangvaite leh pianphunga rualbanlote hamṭhatna tur tam tak a duang chhuak dawn tih a sawi.

India sorkar chu rual­banlohna hrang hrang vanga mi vanduaite tan thil phal zawk nih tumin a inbuatsaih mek thu sawiin Governor chuan, "Hei hian a tak ram a thlen hma chuan keimahni zingah din­hmun ziaawm zawkte'n heng kan khawtlanga mi khawngaihthlak tak takte kan theih tawpa lo ṭanpui chhunzawm zel hi khua leh tui ṭha kan nih anga kan tih tur a ni," a ti.

Governor hian BROWWA-te'n ṭanpui­na - pawnthuah, thawm­hnaw, ei tur leh thil dang an kente a hlan a, ama puala ṭanpuina a ken chu home mother Lal­hmingthangi hnenah a hlan bawk.

Pushpak Medical Camp hi Project Pushpak hnuaia 24 BRTF, 71 RCC leh 74 RCC a doctor leh tualchhung doctor pakhat­in an kalpui a ni.