Aizawlah MZP-in Black Day an hmang

North East Students Organisation (NESO) bultuma The Citizenship (Amendment) Bill, 2016 duh lohzia lantira India hmarchhak pum huapa bandh neihnaah zirlaite sipai hmanga beih an nih duh lohzia lantir nan January 12, Inrinni khan hmarchhak state hrang hrangah Bladk Day hman a ni a, Mizoramah pawh Mizo Zirlai Pawl (MZP)-in an hmang.

MZP chuan Inrinni chhun khan an pisapui kawtah Black Day hawnna hun an hmang a, chumi hnuah Aizawl khawpui chhung hmun hrang hrangah puan (flag dum) an zár a ni.

MZP president L Ramdinliana Renthlei chuan, Lok Sabha-in The Citizenship (Amendment) Bill, 2016 a pass duh lohna lantirtu zirlaite chunga police chet dan avangin NESO bultumin hmarchhak pumah Black Day hman a ni tih sawiin, "Kan zirlaipui state danga police-te kut tuara hliamte hi kan tawrhpui a, thleng nawn tawh lo se kan duh hle. NE-ah BJP sorkarna state apiangah sorkarin zirlaite a bei nasa a ni," a ti.

Mizoramah pawh Mizoram BJP chungchanga MZP hmalak dan tur an la ngaihtuah dawn tih sawiin MZP President chuan, "Mizoramah BJP a awm ve kher pawh hi ngai kan ti lo mai thei a ni," a ti a; The Citizenship (Amendment) Bill, 2016 chu Parliament-ah pass a nih loh nan NESO nen hma an lakho zel dawn thu leh, Mizoram mipuite an ṭanrual a ngaih thu a sawi bawk.