Lungrual takin CAB 2016 dodal a ngai Article 371G-in a dang thei lo - Ronald Sapa

Ronald Sapa Tlau hian nimin khan a inah thuthar thehdarhtute a kâwm a; The Citizenship (Amendment) Bill (CAB) chu sakhaw behchhana dan siam tumna a ni tih sawiin, "Tun hmain sakhuanaa innghat bill thehluh a la awm ngai lo. Bill-ah hian Mosolman-te an tel lo a, Kristiante pawh a tìrah an tel lo a, sawiselna a tam tak em avangin an telh leh hnuhnawh a ni," a ti.

CAB hlauhawmzia Mizo mipuiin an hriat a ngai tih sawiin, "CAB hi pass a nih vaih chuan Bangladesh aṭangin Chakma an rawn lut hum hum dawn. Pass a nih loh nan Mizo mipui kan ṭan tlat a ngai. Páwl bik sawi loa ṭanhoa dodal tlan a ngai a, NGO-te hian min kaihruai thei se. Mizoram sorkar pawhin special assembly-te koh phah ve se, MNF sorkar hi NDA aṭanga an inphawi ve ngam ka phût a ni," a ti.

Vanglaini palai zawhna chhangin Ronald Sapa chuan, Mizorama Chakma-te chu an party-in chi hniha an kaltir thu sawiin, "India independence hma leh kum 1971 hmaa awmte chu Mizorama an lo awm tawh avangin keimahni zinga awm tura pawm hi kan bat a ni ve," a ti. Bangladesh leh Mizoram ramri a kaw reng tih sawiin, "Chakma infiltration chungchangah hian BSF-in foreigner engzat nge an man chhuah tawh tih vawi thum ka zawt tawh a, min chhang thei lo," a ti a; chu chuan BJP sorkar leh BSF-te chu Chakma foreigner chungchangah an ṭang tláng tih a tichiang niin a sawi.

Zawhna chhangin Rajya Sabha MP chuan, Indian Constitution-a Article 371G hmangin CAB chu Mizoram bik tan dan theih a ni lo tih a sawi a, "CAB hi pass pawh ni se, Article 371G hmangin kan inveng tlat thei tia sawi awm hi inbum tumna a ni. Citizenship hi state list a ni lo a, concurrent list pawh a ni lo a, union list liau liau niin, Central thuneihna a ni a, CAB hi Article 371G-in a dang thei lo hulhual a ni," a ti.

Prime minister Narendra Modi chu RSS hruaitu hlun a nih avangin, a kaihhruai sorkarah RSS hoin demand an nei tih sawiin Ronald Sapa chuan, "Tunah hian RSS hnena a intiamnate chu RSS-in an ṭhíng mek a ni," a ti a; BJP tlahniam zelah CAB chu inchhanchhuah nan hman leh India rama Hindu ho vote hîp nan hman an tum nia a sawi bakah, Mizote chîmralna atana hmanraw atan hman an tum a, Bangladesh Chakma-te Mizorama an luh theihna tur kawng hawn an tum niin a sawi.

Rajya Sabha MP chuan, CAB chu Lok Sabha-a an pass hnuah, Rajya Sabha-ah pass a nih loh nan thih ngamin an ṭang nia sawiin, "Engti kawng pawhin kan dâl tur a ni, kan ti a. Rajya Sabha-a session-ah nasa takin kan dodal a, session kan tibuai a, Assam-a Congress party President-te nen placard kengin House laiah kan kal chhuak ngâwk a, a hnuah mi dangte'n min rawn zawm ve a ni," a ti.

Ronald Sapa chuan, CAB chu tunah Rajya Sabha-in dang rih mah se, BJP chuan an tum tlat chuan ordinance hmanga tih an tum palh thei a, mah se, an tih duh an rin loh thu a sawi a, "Joint parliamentary session ko pawhin an ti thei, mahse, an duh bik kan ring lo," a ti. Budget session lo awm leh turah an tharthawh leh an ring tih sawiin, "Chuta tan chuan hmarchhak aṭanga MP-te ṭang rual ila, hmarchhak bial huamtir lo turin kan ngaihtuah. Hmarchhak a huam loh chuan ṭha kan OK a ni," a ti a; chu chu Bill danna tura an inruahman dan a nih thu a sawi.

Rajya Sabha MP chuan, Chakma foreigner, Mizorama dan loa lût rûte chuan an sahim nan leh Mizorama awm nghet sate lehpelhna turin Kristiana inleh tum angin an lang ṭhin niin a sawi a, "Kan missionary-te an ti ṭha hluak a, game an play ve ṭhin; chu chu missionary-te pawhin hriatthiam ve a ngai. Mizorama awm hmasate leh lut rute hi an iner ve ṭhin a ni," a ti.