Kohhran zah lo tan zah tur dang a awm tawh lo - Lal Thanhawla

Congress party chuan nimin khan an pisa, Congress Bhavan chu kum 2019 atan an hawng a; hawnna inkhawmah an president Lal Thanhawla'n thu sawiin, miin kohhran a zah loh chuan zah tur dang a nei tawh lo tih a sawi.

Lal Thanhawla chuan, "Mizo­rama ringtute hian koh­hran kan zah loh chuan zah tur dang kan nei tawh lo. Kohhran lú chu Krista a nih avangin kohhran hnathawh leh a rorelte hi kan pawm thiam tur a ni a, kohhran dodal zawngin Congress party mite'n ṭawngkam kan hmang tur a ni lo," a ti a; Congress-in kum 10 ro an rel chhunga sorkar thar tana buaipui tur kih hnawk an neih ve loh avanga lawm turin Congress mipui a chah.

MPCC president Lal Than­hawla chuan, Assembly in­thlan­puia Congress party tlak chungchangah tumah dem lo a, puhmawh tur zawng lo turin an party mite a chah a, "Ni ṭha lo atan Pathianin roreltu tur a ruat ve ṭhin tho a, chuvangin, kan tana hun ruat hi kan pawm mai tur a ni," a ti.

Lal Thanhawla chuan, Central-a BJP sorkarna hnuaiah India ram economy ṭhanna a tlahniam nasa nia sawiin, "Pawisa tihthihin nghawng a nei nasa a, chhûtna hrang hrangah pawh a hniam zawngin kan kal a ni ber. Chutih lai chuan, state hrang hrangah kan hma lawka MP election kan neih tura Congress thawhpui duhtu, rawn inpe party lian tak tak an awm zel a, Central lamah Congress boruak a sang zel a, sorkar leh ngei tura beisei leh ngaih kan ni," a ti a; Congress party mite chu phûr taka party tana thawk zel turin a sáwm.

Health minister hlui Lal Thanzara pawhin thu sawiin, MNF sorkarin thisen sawngbawl­na man (processing fee) an tih­tawp avanga thil ropui tak ti nia an insawi chu thil ropui tak a ni hran lo niin a sawi a, "Congress sorkar khan sorkar sum renchem taka hmangin, tlema khawsa thei zawkte lak aṭang chauhin processing fee lak a ni," a ti.

Lal Thanzara chuan, Cong­ress sorkar lai khan blood pro­cessing fee chu BPL chhung­khuaa mi te, nau nei leh nau pai vanga thisen mamawh te, emergency-ah te, natna khirh bik, thisen mamawh tam chi-ah leh pawisa lama harsate aṭangin lak a ni ngai lo a, thisen dawngtu tam takin sum chawi loin a thlawnin an dawng char char tho tih a sawi bawk.