CAB pawm a nih chuan Mizote tan India rama tel ngam chi a ni lo - Duhoma

Zoram Peoples' Movement (ZPM) chuan nimin khan kum 2019 atan an pisa an hawng a; ZPM Legislature Party leader Lalduhoma'n thu sawiin, The Citizenship (Amendment) Bill, 2016 (CAB) chu pawm a nih chuan Mizote tan India rama tel ngamna chi a nih loh thu a sawi.

ZPM pisa inkhawm hi Steering Committee chairman Lalliansawta'n a kaihruai a; Lalduhoma chuan, MNF lamin Citi­zenship (Amendment) Bill chu a hlauhawm loh zawng hlîrin social media-ah ṭhahnemngai takin an thehdarh tih sawiin, "Constitution Article 371G hi an hriat chian loh vang mai a ni. He dan siamnaa move-tu kan la awm ve a, tlâwmah la loin min râwn ve nachâng hriat âwm tak a ni," a ti.

Lalduhoma chuan, CAB chungchangah MNF-te chu mipuite thu dik lo fah char charah puhin, "Mizoram hi hmun him loah chantir an tum mek. CAB hi pawm a nih chuan Mizote tan India ram hi tel ngamna a ni lo ang," a ti a; Parliament inthlan lo awm turah BJP-in NDA leh NEDA-a an thurualpuite reng reng chu dahṭhat an ngaih thu a sawi.

ZPM Legislature Party Leader sawi danin, CAB chu Lok Sabha-ah pass a ni tawh a, Rajya Sabha-ah pass theih ni rih lo mah se, Joint Parliament Sitting hmangin BJP chuan an duh chuan an titlang thei tho. Chuvangin, exemption amendment siam a ngai a, chumi atan chuan na taka nawr a ngai a ni. 

Lalduhoma chuan, sorkar tharin tih tura an tiam, an tih tawh chinah an thlâwp dawn tih sawiin, "Zu zawrh tihtawp ṭha kan ti a, dry day pawhsei ringawt erawh tih dan turah kan ngai lo. Tuna kan dinhmun hi Pathian min dahnaah kan pawm a, kan theihtawpin ram tan thawh kan tum. Mipuiin min beisei chu pumkhat ni turin a ni a, chu chu tihlawhtling turin kan hotute'n theihtawp an chhuah mek," a ti.

ZPM Legislature Party deputy leader Vanlalhlana pawhin thu sawiin, MNF sorkar chuan thla khat a tlin tâk thu a sawi a, "Chief Minister-in tu kih hnawkah mah an tàn ve loh tur thu a sawi a, mahse, anmahni kih hnawkah an táng mek a ni," a ti a; MNF chu inthlan hmaa an intiamnate tihlawhtling tura an nawr zel tur thu a sawi.

ZPM Val Upa Council chairman Lalfakzuala pawhin thu sawiin, "ZPM MLA-te hian in kutah mawhphurhna sang tak a awm tih hre reng ula kan duh. Tling zo ve ta lo mi dang 30-te pawh beidawng loa tun aṭanga theihtawp chhuaha bei­seina nen a bei ṭauh ṭauh turin kan duh che u a, kan beisei ang zat tling zo ta hrih lo mah ila, kan dinhmun hi a chhe lo," a ti.

Inkhawmah hian ZPM MLA dang - C Lal­sawivunga, Dr Vanlal­thlana, C Lalchhuan­thanga, Andrew H Thang­liana leh VL Zaithanzama te pawhin thu an sawi a ni.