Home Minister-in Police Sports Meet a hawng

Mizoram Police Sports & Cultural Control Board chuan nimin aṭang khan January 18 thleng awh turin XIX Mizoram Police Sports Meet an buatsaih ṭan a, Home minister Lalchamliana'n Rajiv Gandhi Stadium-ah a hawng.

Home Minister chuan, Mizoram Police-te chu Mizoram chhung mai ni lo, India ram puma hming lang tham khawpin infiamna lamah an awm tawh ṭhin tih sawiin, "A bik takin football-ah an lo lâr tawh ṭhin hle. Mi tam takin sport hi eizawnna atan an hmang a, Police department chu hemi kawngah hian a thawh hlâwk pawl an ni," a ti.

Ram changkanna leh sport a inkungkaih thuk hle tih sawiin Lalchamliana chuan, "Ram hrang hrang inelna Olympics-ahte hian ram changkang chu a chung lamah an awm deuh ber a, sport lama hma kan sawn chuan changkanna kan pan zel tihna a ni," a ti a; Police Sports Meet chuan unit hrang hrang inkara inunauna ṭha lehzual a thlen ngei a beisei thu a sawi.

Mizoram DGP Balaji Srivastava chuan inlawmna thu a sawi a, "Krismas leh kum thar rálmuang taka kan hman theih chhan pakhat chu police-te ṭhahnemngaihna a ni. Kan hnathawhnaah hian taksa sawizawi ṭhat a pawimawh hle a, hna lama hmasawnna thleng tur chuan sport lamah hmasawnna a awm a ngai," a ti.

XIX Mizoram Police Sports Meet-ah hian contingent hrang hrang 12 an tel a, chungte chu - 1st Bn. MAP, 2nd Bn. MAP, 3rd Bn. MAP, 3rd IR.Bn, 5th. IR.Bn, Northern Range (Kolasib DEF/1st IR.Bn), Southern Range (Saiha/Lawngtlai/Lung­lei/Serchhip DEF/PTS), Central Range (Aizawl DEF/ Traffic), Western Range (Mamit DEF/ 4th IR. Bn), North East Range ( Champhai DEF/2nd IR.Bn), Red Group (M.P.R.O/Fire &ES/ACB/FSL), PHQ Group (Police Hedquarters/ CID (SB)/ CID Crime/ Security/ Secretariat) te a ni.