Pulpit tlang thianghlim hi mahni duh duh sawina hmun a ni lo - Zira

Minister R Lalzirliana chuan nimin khan Mizo Hnam Rûna inkhawmah thu a sawi a, "Pulpit tlang thianghlim hi mahni duh duh sawina hmun a ni lo," a ti.

R Lalzirliana chuan, "Pulpit tlang hi evangelist firfiak leh pastor firfiak bakah, upa ṭhenkhatte'n politics sawi nana kan hmang kha pawi ka ti a. Pulpit tlangah hian politics kan sawi duh a nih pawhin, Lal Isua politics, Isua chanchin chauh sawi ila a ṭha ber ang. Pulpit tlang thianghlim hi mahni duh duh sawina hmun a ni lo," a ti a; ZPM sorkar ta se, Presbyterian Kohhranin an tuar bera a rin thu a sawi.

Mizoram inthlanpui zawh takah khan a bialah chuan Congress hoin amah chu an hneh an rin loh avangin Congress thuneitu sangin ZPM vote pui turin an mite an ti nia sawiin Lalzirliana chuan, "Vote 1,000 chuanga hneh tura ka inngaih laiin, 148 chauh ka hnehna a ni ta a ni," a ti.

R Lalzirliana chuan, a department Power & Electricity chu department pangngai deuh a nih thu a sawi rualin, "Soil & Water Conservation chuan ṭhelrêt chìn te, leilung leh tui luangral tur ven hnate thawh tur a nih laiin, an thawh tur tam tak hi department dangin an khawih pawh a ni mai thei a, la en ṭhat a ngai a ni," a ti a; mi hlawhtling ni tur chuan teirei peih a ngaih thu leh hotu senior leh rual-û zawkte zah thiam a ngaih thu a sawi.

Hruaitu ṭha an pawi­mawh rualin, mipui ṭha pawh an pawimawh thu sawiin Lalzirliana chuan, "Mipui ṭha lo hnenah chuan rorelna ṭha a tuh theih loh. Minister leh MLA-te hi an tih tur ni lo, tih luihtir turin mipui leh worker pawhin i nawr lo ang u. Kan hnathawh reng reng hi MNF party hnuaiah chuan a ṭha tur a ni a, eng hna pawhin kum 100 tal a daih tur a ni, hna a chhiat chuan a ram pum mualphona a ni," a ti.