Rannung seh natna vei 152 hmu chhuak
Nikum lamah leh tun hnaiah Thenzawl leh a chhehvelah rannung seh natna (scrub typhus) kai mi 152 hmuh chhuah a ni a; hei vang hian Health department-a mithiamte chuan a hmuna thil awm dan zir chiang tur leh a ṭul anga hma la turin nimin khan team an tîr a, nizan aṭang khan hma an la nghal.
Thu dawn danin, nikum lam leh tun hnaia Thenzawl damdawi-in (Community Health Centre) pantu, Thenzawl leh a chhehvel khaw hrang hrang aṭanga inentirte zingah rannung seh natna hrik pai hmuhchhuah an tam hle a; November 2018 aṭanga nimin thleng khan rannung seh natna kai mi 152 hmuhchhuah an ni tawh.
Thenzawl leh a chhehvela rannung seh natna zir chiang tur leh a ṭul anga hma la turin Health Services hnuaia Integrated Disease Surveilance Programme (IDSP)-a state nodal officer Dr Pachuau Lalmalsawma, epideomologist leh state entomologist Lalfakzuala te chuan staff dangte nen nimin khan Thenzawl an pan a ni.
IDSP team hian nizan khan Thenzawl khaw ṭhenawm, Buangpui khuaah vantlang inkhawm an buatsaih a, rannung seh natna lan chhuah dan, kai theih dan, inven dan leh enkawl dante mipui an zirtir. Vawiinah Thenzawl damdawi-inah a thlawna inentirna, free clinic an buatsaih dawn a, damlote chu an thisen an enfiahsak nghal ang.
Dr Pachuau Lalmalsawma chuan, rannung seh natna vei nia sawite an thisen chu la in, ICMR Laboratory, Dibrugarh-a endik tura thawn an tum tih a sawi.
Health minister Dr R Lalthangliana chuan, Thenzawla rannung seh natna hluar chungchang a hriat tawh thu sawiin, "Damdawi lam thiamte'n a ṭul angin hma an la nghal vat a ni," a ti a; harsatna a thlen thulha rang taka che chhuak nghal zel turin sorkar a inbuatsaih tih a sawi bawk.