SWD Minister-in Eklavya School a tlawh

Social Welfare minister Dr K Bei­chhua chuan nimin khan Lunglei Pukpuia Eklavya Model Residential School, a tlawh a, zirtirtute leh thawktu dangte nen an inkâwm.

Dr K Beichhua chuan, Social Welfare department (SWD) hnuaiah Serchhip leh Lungleiah Eklavya Model School hawn a nih thu sawiin, "Heng sikul pahnihte thuam ṭhatna atan sorkarin hmalakna a kalpui mek. Sorkar hmasa hmalakna pawh ni se, thil ṭha a nih chuan chhunzawm zel kan tum a ni," a ti.

SWD chuan mihring hmasawnna tur thui tak a huam tih sawiin K Beichhua chuan, "Zirna thlengin a huam tel vek a ni. Zirna hi sap pachal kan el phâkna awm chhun a ni," a ti a; zirtirtute chu inchhuanna tham khawpa hna thawk turin a chah.

School principal Lizzy Lalrintluangi chuan, Eklavya Model Residential School, Lunglei chu kum 2008-a hawn a nih thu sawiin, sikulin mamawh a neih hrang hrangte Social Welfare Minister a hrilh.

Eklavya School, Lungleiah hi zirlai 200 awm theihna niin, zirlai 174 an awm mek a, pawl 6-12 thleng a awm a, pawl 11 leh 12-ah science subject hawn tuma hmalak mek a ni.

AH&Vety minister ni bawk Dr K Beichhua chuan nimin chawhma khan Thenzawla AH&Vety Farm Complex a tlawh bawk a, Vety Rest House-ah department hotute leh Thenzawl khaw­tlang hruaitute nen an inkâwm.

Tun hnaiah kum tin Mizorama PRRS a léng ṭhin chu a vei thu sawiin K Beichhua chuan, "Tihtawp a, PRRS lêng loa Zoram siam tum hi department tan chona a ni a, ṭan lak kan tum a ni," a ti a; AH&Vety department chu state dang entawn tlaka siam an tum thu a sawi.

Dr K Beichhua chuan, sorkar hnathawk posting leh transfer chung­changah mi tin duh anga tih vek theih a ni lo tih sawiin, "Hotute'n an dahna chu lungawi taka pawm a, taima leh rinawm taka thawh hi ringtute tih tur a ni a, mahni hnaa rinawm hi Pathian rawngbawlna a ni," a ti.