KHAWTHLIR

MJA General Headquarters chuan vawiin chhun dar 12:30 hian Aizawl Press Club-ah MJA member-te tan kumthar thingpui inhona, inhlan tharna leh inralna hun a buatsaih dawn a, MJA member-te tel vek tura beisei an ni. MJA-in a ràl tur hi January 3, 2019-a thi Zahmingthanga (80) f/o Lalhmachhuana Zofa, Diktawn editor a ni.

Association for Environmental Preservation (ASEP) chuan, an patron C Lalrinsanga chu MLA atana thlan tlin a ni leh cabinet minister a nih avangin nimin khan a pisaah lawmpuina hun an hmang a, lawmpuina thuchei leh sava thlalak an hlan. Minister C Lalrinsanga hian kum 2019 atana ASEP hmachhawp hrang hrangte khuhhawn hun a hmang nghal a ni.

Chief minister Zoramthanga chu New Delhi-ah a chám mek a, sorkar laipuia mi pawimawh hrang hrangte Mizoram hmasawnna hnathawh a nih theih dan turte a sawipui a ni.

Lunglei District MJA leh Lungleia IPR department-a thawkte chuan nimin khan IPR conference hall-ah inhlan tharna hun an hmang. Lunglei IPRO C Lalremruati chuan, MJA-te nen thawhhona ṭha an neih zel a beisei thu a sawi a; Lunglei MJA president H Lalthansanga chuan, ram leh hnam, Lunglei district hmasawnna tura theihtawpa hmalak zel an tum thu a sawi bawk.

Social Welfare minister Dr K Beichhua chuan nimin khan Lungleia Social Welfare department pisa a tlawh. Dr Beichhua chuan, zu leh ruihhloin Mizoram a tihchhiatna laka chhawmdawl hna thawk tur leh ruihhlo do turin hma an lak dawn thu a sawi a, "Kan ram chhe mek tungding turin pawimawh bik kan awm lo a, kan zavaiin i thawkho ang u," a ti. 

Nimin khan Lawngtlai DC N Chakhai hoin DC conference hall-ah kumina Lawngtlaia Republic Day hman dan tur department hotute, zirna ina hotute leh tlawmngai pawl hruaitute'n an sawiho. Meeting chuan Republic Day hian zirna in, sorkar pisa leh sorkar quarter-ahte hnam puanzar zar vek turin thutlukna a siam a ni.