CM-in PM Modi a kâwm Citizenship Bill a sawipui
Mizoram chief minister Zoramthanga chuan January 14, Thawhṭanni khan New Delhi-ah prime minister Narendra Modi chu a chenna inah hmuin a kâwm a; The Citizenship (Amendment) Bill, 2016 chu Mizoram sorkar leh Mizo mipuite'n an duh loh thu a hrilh.
New Delhi-a cham mêk CM Zoramthanga hian Lok Sabha-in a pawm tak The Citizenship (Amendment) Bill, 2016 (CAB) chu an party-in ṭha an tih loh thu leh Mizoram mipui pawhin ṭha an tih loh thu Prime Minister a hrilh a, Parliament-in a pass a nih pawhin, India hmarchhak bial leh a bikin Mizoram a huam lohna tura hmalakpui turin a ngen.
Zoramthanga chuan Narendra Modi hnenah hian mau hman ṭangkaina tur bamboo project-a hmalak a duh dan hrang hrangte a hrilh a; Mizoram mamawh hrang hrangte thlenin, Jet Airways-in February 10, 2019 aṭangin Mizorama an service tihtawp an tum chungchangah sorkar laipui puihna a ngen. Mizoram tana all India service cadre hrang neih chungchang pawh PM Modi-a hnenah a thlen bawk.
Jet Airways hian Mizorama an thlawhtheihna service an tihtawp chuan, Mizoramah Air India chiah a service dawn a, Mizoram aṭanga zin chhuak tur leh Mizoram pan turte'n harsatna nasa tak an tawk thei dâwna ngaih a ni.
Zoramthanga leh PM Narendra Modi te hi ṭha takin an inkâwm a, Mizoram CM thil thlente chu a ṭul anga a bawhzui tur thu a hrilh a ni.
CM Zoramthanga hian nimin khan Union Home minister Rajnath Singh a hmu bawk a, Mizoram tana a hranga all India service cadre neih dan tur te, Aizawl khawpui lailí aṭanga Zemabawk Zokhawsanga Assam Rifles sawn chhuah dan turte leh thil pawimawh dangte a sawipui nia thu dawn a ni.
Nimin tlai vek khan Zoramthanga hi National Disaster Management Authority member-te nen an inkâwm a; Hunthar Venga lei tlahniam leh Mizoram hmun danga hmun hlauhawm zualte siamṭhat dan an sawiho.
Chief minister hi Sports & Youth Services minister Robert Romawia Royte, Finance principal secretary Lalnunmawia Chuaungo leh PWD chief engineer K Lalsawmvela ten an ṭawiawm a ni.