CADC sorkar paihthlak a ni

Chakma Autonomous District Council (CADC)a chief executive member (CEM) Shanti Jiban Chakma chuan January 14, Thawhṭanni khan CADC session-ah a no-confidence motion put luh a hmachhawn a, paltlang zo loin, CEM aṭangin paih a ni.

CADC session hi deputy chairman Durjya Dhan Chakma chuan a kaihruai a; CEM Shanti Jiban Chakma lakah hian MNF MDC Rasik Mohan Chakma chuan rin tawk lohna, no-confidence motion a pu lut a ni.

Vote laknaah hian MDC 10-in CEM paih an duh a, MDC pakhatin a thláwp thung a, MDC pasarih chu session-ah hian an tel lo.

SJ Chakma paihthlak a nih tak avang hian, CADC sorkar chu ṭhiah a ni a, executive committee (EM) dangte pawh paih an ni.

Thu dawn danin, nikum April thlaa CADC inthlanpuia Congress party MDC pasarih zinga pali chuan tun hnai khan MNF party an zawm a, chuvang chuan MDC pasarih nei sa MNF chuan MDC 11 an nei ta a, member 20 awmna CADC-ah hian MNF chuan sorkarna an siam thei ta chiah a ni.