MLA lirthei leisakna tihsan a ni

Mizoram sorkar chuan, Mizoram Legislative Assembly term thara MLA-te lirthei leina tur sum sorkarin a tumsak ṭhin chu a tipung a, MLA pakhat tana Rs. 8,00,000 pek ṭhin chu Rs. 10,00,000 a ni tawh dawn.

Thu dawnnain a sawi danin, tun hnai khan chief minister Zoramthanga hoin MLA-te lirthei leina chungchang leh ṭul pawimawh dangte rêlin sorkar mi pawimawhte an ṭhu khawm a; MLA-te lirthei leina atana sorkarin sum a pek ṭhin chu cheng nuai 10-ah tihsan an relthlu a ni.

MLA-te hian an duh chuan sorkar aṭanga motor leina tur sum an dawn (cheng nuai 10) aia man to motor an lei thei a; chutiang a nih chuan, sorkarin a tumsak cheng nuai 10 baka sum la ngai chu anmahni pawisa an sên belh a ngai thung.

MLA-te tana sorkarin lirthei leina a pek ṭhin hi MNF sorkar hmasak hun lai, 4th. Assembly, kum 1998-2003 term aṭanga kalpui ṭan a ni a, a bul ṭannaah hian kum 1999 khan MLA pakhat tan Rs. 4,00,000 pea bul ṭan a ni.

 Mizoram state 5th. Assembly (2003-2008) khan Rs. 5,50,000-ah tihsan a ni a, Mizoram state 6th. Assembly (kum 2008-2013) khan Rs. 6,50,000-ah tihsak a ni leh a; state 7th. Assembly (2013-2018) khan Rs. 8,00,000-ah tihsan a leh bawk.

Mizoram state legislative assembly pariatnaa MLA-te motor leina man tihpun a nih avang hian Assembly Secretariat chuan Finance department-ah sum an dil belh mek a ni.