END-in December 2018 chhungin Zu leh ruihhlo vangin mi 153 an man

Excise & Narcotics depart­ment chuan nimin khan an commissioner Ngurchungnunga Sailo hoin commissionerate conference hall-ah review mee­ting an nei a, December 2018 chhunga Mizoram inthlanpui leh Krismas vuakveta an hmalakna leh hnathawhte an thlir let. Zu kaihhnawihah mi 99 man an nih thu leh ruihhlo dang kaihhnawihah mi 54 man an nih thu an tarlang.

Meeting-a tarlan danin, December 2018 chhung khan Excise & Narcotics department (END) enforcement-te chuan rakzu litre 26,923 leh zu bilh lai ṭín 3,747 an man a, sap zu (Indian made foreign liquor) ûm puitling 211 leh ûm chanve 463 an man bakah, beer can 304 an man. Zu kaihhnawihah mi 99 an man a, zu kaihhnawiha thubuai ziah luh zat erawh 148 a tling.

END staff-te chuan nikum December thla chhung vêk khan heroin kg. 1 leh gram 565, ganja kg. 7.22, Alprazolam, etc. mûm 1,410 leh khuh damdawi 1,374 an man a; chu'ng kaihhnawihah chuan mi 54 manin, thubuai 45 an ziak lut a ni.

END thuchhuah chuan, December 21, 2018 aṭangin Mizo­ram­ah dry day hman chhunzawm zel a nih thu tarlangin, "Hetih chhung hian Mizoram State Liquor Prohibition Coordination Committee kaihhruaina angin Mizoram hmun tinah zu leh ruihhlo khuahkhirh hna uluk taka kenkawh a ni," an ti a; END bakah, Police department leh YMA-ten theihtawpin hma an lak thu leh, END minister Dr K Beichhua'n duty-te a tlawh kual ṭhin thu an tarlang.

Mizorama hunpui hman zawh tâkah END chuan Mizo mipui leh tlawmngai pawlte nen thawhhona ṭha tak an nei tih sawiin, "Thawhhona ṭha tak vangin kum dang ai mahin zu leh ruihhloa buaina an tawh tlem tawh a, Excise & Narcotics department chuan lawmthu kan sawi a ni," an ti.

Hetih lai hian END chuan, dry day hmanga zu khuahkhirh a nih mek laiin, Rangvamual leh Phunchawng velah dan phal loha zu zuar leh siam rutute'n tunlaiin an zu siamnaah Instant Yeast (chhang siamna dawidim chi khat) an pawlh nasa tih sawiin, "Heng laia rakzu hi mihring tana in hlauhawm a ni a, mihring thâ (nerve) natna leh natna dang thlen awlsam tak a ni," an ti a; chuvang chuan, Phunchawng leh Rangvamuala rakzute chu in lo turin mipui an ngen a ni.