Scrub typhus len vangin free clinic buatsaih

Health department hnuaia Integrated Disease Surveilance Programme (IDSP) team chuan, nimin khan Thenzawl leh Buangpui khuaahte rannung seh natna (scrub typhus) kai leh kai loh enfiah duhte tan free clinic/test an buatsaih.

Thenzawl leh a chhehvelah hian nikum November thla aṭanga kumin January 14 thleng khan scrub typhus vei mi 152 hmuh chhuah an ni tawh a, hei vang hian IDSP team, Dr Pachuau Lalmal­sawma, state nodal officer kaih­hruai chuan a hmuna thil awm dan enfiah tur leh inentirna hun buatsaih turin January 14, Thawhṭanni khan Thenzawl an thleng a ni.

IDSP team hian Thawhṭanni zan khan Buangpui khuaah awareness campaign an nei a, khawtlang mipui kalkhawmte hnenah rannung seh natna kai theih dan te, inven dante leh a veite enkawl dante an zirtir a; nimin khan Buangpuiah hian a thlawna thisen endikna an buatsaih nghal bawk.

Nimin vek khan Thenzawl damdawi-in (CHC)-ah a thlawna thisen endikna buatsaih a ni a, scrub typhus vei hmuhchhuah tawhte an enfiah nawn leh niin, mi 129 enfiah zinga mi 120 chu rannung seh natna kai an ni tih finfiah nawn a ni.

Nimin chawhnu khan IDSP hotu te, Thenzawl CHC-a doctor-te leh Thenzawl khaw chhunga thuthar thehdarhtute'n Thenzawl leh a chhehvela scrub typhus lêng mek chungchanga invenna leh mipui zirtir kawnga ṭan lakho dan turte Thenzawl CHC-ah an sawiho bawk.

Dr Pachuau Lalmalsawma chuan, rannung seh natna veite thisen an lakte chu IMCR Laboratory, Dibrugarh-ah endik tura thawn an tum thu a sawi a; tun hnaia rannung seh natna vei an tam lutuk chu endik nawn leh vek an duh tih a sawi a ni.

Thenzawl leh a chhehvelah hian kum 2015 aṭangin scrub typhus hriat ṭan a ni a, kum 2015 khan Thenzawl damdawi-inah a vei hmuh ṭan a ni. May 2018 vel aṭang phei chuan a hluar hle a, May thla leh July thla khan rannung seh natna vangin Thenzawlah mi pahnih an thi nghe nghe. 

Hengte vang hian July 10, 2018 khan IDSP chuan Thenzawlah rannung seh chungchangah awareness campaign leh free clinic an lo buatsaih tawh a ni.