MNF party minister bik ka ni lo - Dr K Beichhua

Minister of state Dr K Beichhua chuan nimin khan Lawngtlai a tlawh a,  MNF party minister bik a nih loh thu a sawi.

Dr K Beichhua hi Lawngtlai East bialtu MLA H Lalbiakzauva, Lai Autonomous District Council chiwef executive member T Zakunga, Lawngtlai DC N Chakhai leh official dangte'n Circuit House-ah an lo hmuak. 

Dr K Beichhua chuan, "MNF minister bik ka ni lo a, Mizoram minister ka a ni. Inthlahrung loin tu pawhin ram hmasawnna atana khawtlang ma­mawh­te chu ka hnenah thlen theih a ni," a ti a; MNF sorkarin kawng chhe lutuk siamṭhat thuai chu ngaih pawimawh pathum zingah a telh tih a sawi.

Ruihhlo ngaite chhan­chhuahna atan man to lua a awm lo tih sawiin Beichhua chuan, "Pu Zoramthanga kaihhruai sorkar hi kan ṭhalaite nun tichhe mektu ruihhlo dona atan a inphal zau bakah, a inhawng zau hle a, sorkar enkawlna hnuaia zu zawrh zawng zawng tihtawp a ni tawh a ni," a ti.

Dr K Beichhua chuan, a department chante chu department pawimawh tak vek an nih thu sawiin, "A bik takin Social Welfare department hi autonomous district council huam chhunga cheng tribal-te tan a pawimawh hle a ni," a ti a, ADC chhunga chengte hmasawnna tur a ngaih pawimawh thu a sawi.