Duhoma min puhna a dik lo - MNF

MNF party chuan thuchhuah siamin, ZPM Legislature Party leader Lalduhoma, MLA-in 'MNF chu Citizenship (Amendment) Bill, 2016 chu a hlauhawm loh zawng hlîra ṭhahnemngai taka thu thehdarhah a puh niin an tarlang a, Lalduhoma'n a puhna chu thu dik lo niin an sawi.

MNF chuan, The Citizenship (Amendment) Bill (CAB) chu MNF party-in a hlauhawm loh thu a la sawi ngai lo nia sawiin, "Bill dodalna leh duh lohna thu vantlang hmaah leh chanchinbumite hmaah MNF president Pu Zoramthanga'n ṭum engemaw zat leh vice pre­sident Pu R Tlang­hmingthanga'n an lo sawi daih tawh. Chu chu press release-ah siam a niin, a hnuah social media-ah vawrh leh chauh a ni," an ti.

CAB chu MNF-in an duh lo hul hual nia sawiin MNF chuan, "Lok Sabha-ah pass tawh mah se, Rajya Sabha-ah a tlang lohna turin January 10, 2019-a CM Pu Zoramthanga hoa Council of Minister meeting chuan a theihna hmun apiangah hma a lak zel tur thu a lo passed tawh zawk a ni," an ti a; New Delhi-a chám mek CM Zoramthanga'n January 14, Thawhṭanni chawhnu dar 4:15-ah prime minister Narendra Modi a hmu a, Mizoramin CAB a duh loh thu a sawipui niin an tarlang.