Rintlaka thawk turin fuih

Health minister Dr R Lalthangliana chuan, nimin khan Secretariat conference hall-ah Health department hotute a kâwm a; rintlak taka hna thawk turin a fuih.

SEDP-ah hriselna an ngai pawimawh hle tih sawiin Dr R Lalthangliana chuan, "Mipui kan hrisel zawk nan invenna lama hmalakna hi nasa zawka kalpui a ngai dawn. Damlo tihtlemna kawnga hma kan sawn chuan inenkawlnaa senso kal ral tur kha kan hum thei ang. HIV vei sanna ber leh cancer natna tamna state kan ni hi a pawi a, heng natna khirh tak takte tihhniam a nih theih nan ngun taka ruahmanna siam a ngai a ni," a ti.

Health Minister chuan, sorkar hmalaknain khawl ṭha tak tak lei ni mah se, enkawltu leh enkawl zui ni ta lo tam tak awm ṭhin thu sawiin, "Hmalakna kan ṭan a nih chuan, hmalakna zik tluak a ni tur a ni," a ti a; Health & Family Welfare department-a thawktute chu mihring hriselna leh damna an kutah thui tak a innghah avangin, an hnaa chiang tur leh anmahni pawimawhna hre thar turin a chah.

Meeting-ah hian Health directorate-a mite leh chief medical officer-te bakah, AYUSH, MSACS, Food & Drugs, State Referral Hospital leh nursing lama hotute'n an hnathawh hrang hrangte an tarlang a ni.