KHAWTHLIR

Mizo Higher Secondary School NSS chuan nimin khan Aizawl Civil Hospital Blood Bank-ah blood donation camp an huaihawt a, zirlai mipa 43 leh hmeichhia pangate'n thisen unit 48 an pe. Thenzawl Bial ṬKP pawhin Serchhip District Hospital tan thisen unit 34 an pe a, a petute mipa 26 leh hmeichhia pariat an ni.

Champhaia Excise & Narcotics department chuan, Champhai Joint YMA leh SRS-te nen 

ṭangrualin nimin khan Khankawn khuaah heroin gram 34.5 (hawng thum) an man a, a neitua puh Lalṭhazuali (50) s/o Santhang, Champhai 

Dinthar nia inchhál an man nghal bawk.

Land Revenue & Settlement (LRS) minister Lalruatkima chuan nimin khan a pisaah LRS department-a thawkte a kâwm a, department hmalaknate a sawipui. Lalruatkima chuan, sorkar hnathawkte chu rinawm, ṭhahnemngai leh phûr taka mipui rawngbawl hna thawk tura beisei an nih thu a sawi a, department official-te chu ram chungchanga buainate chu dan tlawhchhana dik taka chinfel tum tur leh an thiamnate hmang ṭangkai turin a chah. 

Sports & Youth Services minister Robert Romawia Royte chuan nimin khan New Delhi-ah Ministry of Tribal Affairs Secretary a kâwm a; Mizorama infiamna leh rimawi lam tihhmasawnna dan tur leh district hrang hranga tribal sports tihhmasawn dan tur a sawipui.

Nimin khan Champhai DC Dr Naveen Aggarwal hoin a pisaah Champhaia Republic Day hman dan tur sawiho a ni a, sorkar official leh tlawmngai pawl hruaitute an tel. Republic Day Celebration Committee chuan, Republic Day chu ram ni pawimawh bik a nih angin, sorkar hnathawk leh mipuite chu ngai pawimawha kal ṭheuh turin an sáwm a ni.

MZP Sub-Headquarters, Tlabung chuan thuchhuah siamin, Tlabunga Power & Electricty department junior engineer (JE) an awm nia sawiin, pawi an tih thu an tarlang a, "Ocober 2018 vel khan P&E JE hi sawn chhuah a ni a, a aiawh tur dah a nih loh vangin department-a thawkte'n khawtlang mamawh power supply thilah leh department inrêlbâwlnaah harsatna an tâwk nasa em em a ni," an ti.