Sorkarin NIB a la ṭhiat lo NLUP sem a ni tawh lo

Vanglaini palai thu dawn danin, NIB hi ṭhiah a la nih loh avangin NIB-a thawkte chuan pisa an la kai tho a, hma thar erawh an la tawh lo.

 NLUP atan sum sem tur la awm tho mah se, nikuma Assembly inthlanpui puan hnua Model Code of Conduct puan a nih hnuah ṭanpuina sem chhunzawm a ni tawh lo a, sem chhunzawm a nih dawn leh dawn lohah thutlukna siam a la ni lo.

Kum 2018-a Congress MLA 34 leh kum 2013 MLA inthlana Congress party candidate tling lo mi palite NLUP dawng tura thlang tura tih an nih hnuah, thlan thar lehte tih loh chu NLUP dawng tura thlante pek kim deuh vek an ni tawh a; dawng lo an awm chuan eng emaw harsatna bik a awm vanga ngaih a ni.

Hetih lai hian, kum 2018-a Congress MLA 34 leh MLA-a tling lo mi palite bial leh an dinna bial chhunga NLUP dawng tur thlang tura an tihte chu Rs. 50,000 pek an ni tawh a, la pek loh Rs. 50,000 chu pek an nih dawn leh dawn loh hriat a ni lo.

Congress MLA leh MLA candidate-te hian NLUP dawng tur hian mi 400-510 inkar an thlang hlawm.

Zawhna chhangin NIB hotute chuan, "NLUP hnuaiah hian pawisa la awm tho mah se, nikum MLA inthlan dawna Model Code of Conduct puan a nih hnuah NLUP sem chhunzawm a ni lo a, a dawng tur pawh thlan thar a ni lo. Hetih lai hian, NLUP hnuaia hna kal laite erawh thawh chhunzawm a ni," an ti.

NLUP hnuaiah hian auto-rickshaw dawng tura thlan tawh mi 100 chuang la dawng lo an awm. NLUP hnuaia auto-rickshaw sem hi company pakhatin Gauhati High Court-ah an khing a, Court-in a stay avangin sem theih a ni lo.

Nikuma Assembly inthlan dawn hnaih khan Court chuan thutlukna siamin, sem chhunzawm a phal a, mahse, Model Code of Conduct vangin sem hman a ni lo.

NLUP Implementing Board hnuaiah hian NLUP avangin mi eng emaw zat chhawr an ni a, chu'ng mite chuan tun thlengin office an kal chhunzawm a, an awm zel dan tur erawh sorkar kutah an innghat a ni.