MJA tan free clinic buatsaih nei ṭan

Civil Hospital, Aizawl (CHA) chuan nimin aṭang khan Aizawla Mizoram Journalists' Association (MJA) General Head­quarters member-te tan a thlawna inentirna, free medical check-up an buatsaih ṭan a, January 25 thleng neih tum a ni.

CHA hian kum 2009-ah Aizawla MJA member-te tan free medical check-up an tihsak ṭan a, kumina mi hi a ṭum rukna a ni.

 Nimina health check-up ṭannaa hian CHA medical superintendent Dr KL Remsanga chuan, MJA nen thawhhona ṭha tak an nei reng ṭhin tih sawiin, MJA member-te tan CHA-in health check-up an buatsaih thei chu lawm­awm a tih thu a sawi. 

Dr KL Remsanga chuan, sorkar hmasaah CHA-te'n hmanraw ṭha chi hrang hrang an dawn thu sawiin, "NEDP hnuaia hmanrua leh khawl thar eng emaw zat kan neihte hi kan hmang ṭangkai vek a, hman loha dah mai mai a awm lo," a ti a; blood processing fee lak ṭhin chu BPL chhungkuaa mi te, nu nau neite leh thisen mamawh reng ṭhinte chu a thlawna pek an nih thu sawiin, "User charge tlingkhawm hmang hian private security guard kan lak theih bakah, thawktute'n kan tih theih vek loh damdawi-in leh a vel tihfai hna thawk turte kan rawih theih phah a ni," a ti. 

CHA Medical Supe­rintendent chuan, CHA-ah oxygen generating plant bun zawh tawh a nih thu sawiin, "Pipe hmangin casualty leh ward hrang hrangah pek a ni dawn, hman ṭan mai theiha peih a ni tawh," a ti a; MJA member-te tana free health check-up an tihsak ṭhin chu a ṭangkai thu sawiin, tun hmaa an lo neih tawh ṭhinah pawh natna khirh bik hmuh chhuah phahnate a nih tawh thu a sawi a ni.

MJA president Zonun­sanga Khiangte pawhin thu sawiin, CHA-in MJA tan a thlawna inentirna an buatsaih ṭhin chu a hlu tak zet tih sawiin, "CHA hi kan inti neitu hle a, kan chhawr ṭangkai hle bawk. MJA member-te hi inenfiahna hun nei lo leh a nacháng hre lote kan ni hlawm a, hetianga min tihsak ṭhin hi a lawmawm tak zet a ni," a ti.

Zonunsanga Khiangte chuan, Dr KL Remsanga kaihhruaina hnuaiah CHA-in hmasawnna tam tak a nei tih sawiin, "Sorkar sum tihek kher loa ward pawimawh leh mipui mamawh tak tak mimal inphalte hmanga din a ni te, wheel ramp dah a nite hi a lawmawm hle a ni," a ti a; Health minister Dr R Lalthangliana chu journalist-te ngaihsak em emtu a nih avangin MJA an lawm thu a sawi bawk.

MJA member-te puala CHA-in free medical check-up buatsaih hi January 25, 2019 thleng neih tura ruahman a ni a, chumi chhung chuan MJA Gen.Hqrs. member zawng zawngte hriselna dinhmun enfiah kim hman tum a ni.