Minister-in Agape Home a tlawh
Social Welfare minister Dr K Beichhua chuan nimin khan Siaha thlen bul, Amobyu Vaihthieh khuaa Evangelical Church of Maraland (ECM)-in ruihhlo ngaite chhawmdawlna hmun an siam, Agape Home a tlawh.
Dr K Beichhua chuan thu sawiin, "Chief Minister-in sorkar thar thil ngai pawimawh hmasak pathum zinga pakhat ruihhlo do mawhphurtu Excise & Narcotics department enkawl tura min dah hi ropui ka ti a, tling lo ka inti hle. Ruihhlo vanga tuarte chhawmdawlna hna thawk thei turin Social Welfare department ka chang leh bawk a, ka koa mawhphurhna tla hi Pathian remruat a ni," a ti.
Siaha bialtu MLA chuan, a bial chhungah Eklavya Model Residential School hawn a nih tur thu te, Siaha Vety Farm din thar a nih tur thu te, Centre of Excellence for Boxing & Football hawn a nih tur thu leh a hmun tur en fel nghal a nih tur thu te, Siaha khawpui tui lama harsatna sutkian nan project siam tuma hmalak mek a nih thute a sawi bawk.