MR bill-ah nuai 3100 chuang pe chhuak tawh Kalphung ngaiin kan kal zel ang - Health Minister

Sorkar kum kal mek, April 1 aṭanga December 2018 chhungin Mizoram State Health Care Society (MSHCS) chuan sorkar hnathawk medical reimbursement (MR) bill-ah cheng nuai 3100 chuang a pe chhuak tawh.

Hetih lai hian, Health minister Dr R Lalthangliana chuan, sorkar hmasain sorkar hnathawk MR bill a kalpui dan chu an chhunzawm zel tur thu a sawi a, "A ṭha lam a ni a, kan kalpui zel dawn a, tihtawp tumna a awm rih lo," a ti. 

MSHCS hotute hnen aṭanga thu dawn danin, April 1 aṭanga December 2018 thleng khan sorkar hnathawk leh an chhungte, Mizoram chhung leh pawn lama inenkawl mi 10,017 an awm a, chu'ng mite'n MR bill-a pawisa an dil belhkhawm chu Rs. 49,04,94,547 (nuai 4904.94) a ni tling. 

Bill lutte chu MSHCS chuan Central Government Health Scheme (CGHS) rate angin uluk takin an endik a, endik hnuah mi 7,263-te dilna (MR bill) an pawm a, Rs. 31,25,35,693 (nuai 3125.35) an pe chhuak tawh. Dilna zinga MR bill eng emaw zat, Rs. 7,38,69,089 (nuai 738.69) hu an paihsak thung.

MSHCS hotute chuan, thla kaw (9) chhunga MR bill pek chhuah tawh aṭanga chhûtin, thla thum dang la awm leh tur, January -March 2019-a bill kal leh tur nena chhût pawhin, kum danga sorkar hnathawk MR bill atana senso zat hman a ni dawn lo niin an sawi a; sorkar sum tam tham tak sorkarin a hum thei dawn niin an sawi. CGHS rate anga MR bill endik a nih hma chuan, kum khatah cheng vbc. 80-100 vel sên ṭhin a nih thu an sawi bawk.

Sorkarin CGHS rate anga sorkar hnathawk MR bill a kalpui chu sorkar hnathawk tam takin ṭha an tih laiin, sorkar office ṭhenkhata thawktute'n MSHCS staff-te an lo ân khum a, an vau hial ṭhin tih sawiin MSHCS hotute chuan, "Bill kan zir chian a, kan pawm hnua department-a kan pek letnaah sorkar thar awm huna tihtawp a nih tur thu sawia kan naute lo vau tâwk pawh an awm," an ti.

Sorkar hnathawk MR bill chungchangah rin thua thil sawi chíng an tam thu sawiin MSHCS hotute chuan, "Sorkar tih a ni a, Chief Secretary kaihhruaina hnuaia rêl a ni," an ti a; thutlukna siamtu committee-ah Health Secretary leh Principal Director-te pawh an tel thu an sawi.

MSHCS hotute chuan, MR bill chu uluk taka an enfiah ṭhin thu sawiin, "Paih tur ringawt kan zawng lo a, damlote hi a tam thei ang ber pek kan tum, cash memo-ah dik lo tak tak a tam vang a ni," an ti.

Phai pantu zingah entitlement ang loa bill ṭâlh tum, man chhuah an awm fo rualin, mi tam tak chuan dik takin an bill mai tih sawiin, "Entitlement chungchangah dik lo a la tam zawk," an ti.

Mimal damdawi-ina awmte aṭangin MR bill-ah harsatna an tawh dan sawiin MSHCS hotute chuan, "An rate a hrang thluah si a, keiniin CGHS rate angin kan lo endik leh si a, sorkarin private hospital-te chu rate inang hmantir thei se, an rate control se a zia thei ang," an ti a; CGHS rate hman mek chu sorkarin a duh chuan a tihsan theih zawk thu an sawi bawk.