Ram himna chungchang Home Minister sawipui
MZP General Headquarters hruaitute chuan nimin khan Home minister Lalchamliana chu a pisaah an kawm a, Inner Line Permit (ILP), Mizoram ramri leh Sairang thlenga rél lo luh huna Mizote himna tura lo inven chungchangte an sawipui.
MZP hruaitute chuan, ILP chungchangah, a enkawltu leh khawihtu atana ruatte inthlahdah ṭhin vang leh fimkhur tâwk loh vangin Mizoram mipuite'n kawng tam takah harsatna a tawh ṭhin thu an sawi a; ILP chu kalphung felfai zawk leh hnam dang sponsor-tute'n an mawhphurhna an hlen theih dan tur te, ILP pek chhuahte chu an permit thih huna an awmna chin leh khawsak zui dan hriat zui zel a nih theih nan computerize vek turin Home Minister an ngen.
Mizoram ramri chungchangah, tun aia ven uluk a ngaih thu te, Mizoram ṭhenawm state-te'n Mizoram an nêk nasat dante sawiin, Mizo pi leh pute aṭanga Mizote ram chin chu Mizoramin a chán hret hreta an hriat thute an sawi a; nasa zawka ramri venhim hna hna thawk tur te, ramri-ah sipai dah belh tur te, khauh zawka dan loa Mizorama lutte dapchhuah a nih theih nana hma lakpui turin an ngen a ni.
Kum 2020-ah Mizoram chhung, Sairang thlengin rél lian a lut dawn tih sawiin, MZP hruaitute chuan, ram ril zawka rél lut chu changkanna a nih rualin, Mizoram chhunga chengte tan a him tâwk loh dan tam tak a awm thu an sawi a, "Ni tin kan ramah hnam dang sang chuang an lo lut reng tawh tura ngaih a nih avangin, kan ram leh hnam chîmrala kan awm lohna turin ruahmanna felfai tak siam a ṭul a ni," tiin Home Minister hnenah rawtnate an thlen.
HM Lalchamliana chuan, Assam leh Mizoram ramri chungchanga buaina awmte sukianga ngaihtuah zuitu tur Core Committee thar din turin Chief Minister sawipui a tum thu sawiin, remchang hmasa berah Bairabi Zophai pawh MZP hruaitute nen tlawh tura ruahman a tum thu a sawi.
ILP pawh kalphung ṭha zawk hmanga kalpui a nih theih nan hmalak a tum thu te, ramri venghim turin ramri-ah sipai tam zawk dah tum a nih thu te, Mizorama rêl lian a luh hunah ILP checkpost changtlung tak siam a nih tur thute a sawi bawk.