CADC MNF-in sorkar siamtir turin ngen

Chakma Autonomous District Council (CADC)-a MNF Legislature Party leader Rasik Mohan Chakma chuan January 15, Thawhlehni khan District Council and Minority Affairs Secretary hnenah lehkha thawnin, CADC-ah MNF-in sorkar an siam theih thu a thlen.

Tarlan tawh angin, CADC-a chief executive member (CEM) ni lai Shanti Jiban Chakma kaihhruai sorkar chu January 15, 2019 khan session-ah bûk a ni a, bûkna hi paltlang zo loin CEM chu paih a ni.

CEM Shanti Jiban Chakma paih a nih hnuah, MNF Legislature Party leader RM Chakma chuan District Council and Minority Affairs department Secretary hnenah lehkha a thawn nghal a, CADC-ah sorkar siam theihna khawp MDC thláwptu a neih thu a thlen a; sorka siamtir turin a ngen.

Tarlan tawh angin, April 2018-a CADC inthlanpuiah Congress party-in seat pasarih, BJP-in seat panga leh MNF party-in pariat an la a, a hnuah MNF MDC pakhat chu a thih avangin MNF chuan MDC pasarih an nei zui a ni.

Inthlan zawhah Congress leh BJP chuan sorkar inṭâwm siamin, Congress MDC SJ Chakma chu CEM a ni a; mahse, tun hnaiah Congress MDC palite'n MNF an zawm avangin MNF chuan MDC 11 an nei ta a, member 20 awmna CADC-ah sorkar an siam thei ta a ni.