Minister-in sorkar dept. hotute a kâwm

Minister K Lalrinliana chuan nimin khan Kolasib DC conference hall-ah Kolasib district-a sorkar pisa hrang hrang hotute a kâwm a, an district hmasawn dan tur a sawipui. K Lalrinliana hi Serlui bialtu MLA Lalrinsanga'n a ṭawiawm.

K Lalrinliana chuan, sorkar depart-ment hotute chu hmasawnna hnathawh kawnga harsatna an neihte a zawt a, chak zawka ke pên theihna tura ṭangkai turte ngaihtuahho a nih theih nan inhmuhkhawm buatsaih a nih thu a sawi a, "Sorkar tharin ṭhahnemgai taka hmalak a tum a, department tinte'n hmasawnna hnathawhna tur project an siam taimak a pawimawh dawn a ni," a ti.

Kut hnathawktute'n an thar chhuahte an phurhchhuahna tur kawng a pawimawhzia sorkarin a hriat thu sawiin K Lalrinliana chuan, "Hemi chungchang bik buaipui tur Link Road Board siam tum a ni," a ti a; department hrang hrangte chu an mamawh leh hmalakna tur atana an ruahmannate January ral hmaa ziaka a hnena thehlut turin a hrilh.

MLA Lalrinsanga pawhin thu sawiin, "Sorkar hnathawkte hi Mizoram tun dinhmun min hruai thlengtu leh tun aia hmasawna ke min pênpuitu turte an nih vangin an pawimawh em em a. Ṭhahnemngai leh district hmangaih takin hna kan thawk tlang ang a, district hmasawn leh entawntlak kan ni ngei ang," a ti.

Meeting-ah hian Kolasib district-a sorkar department 42-te'n an hmalakna te, an induhkhawp lohna te, an hmachhawpte an sawiho a; thawktu indaih lohna chu an harsatna tam ber a ni.