Serchhipah Handloom Exhibition cum Sale

Nimin aṭang khan Serchhip Hmarveng YMA Hall-ah district level 'Handloom Exhibition cum Sale' buatsaih ṭan a ni a, bialtu MLA Lalduhoma’n a hawng.

Exhibition cum Sale hawnna inkhawmah Lalduhoma chuan, India ramah handloom industry hmanga ei zawng mi nuai 43 chuang an awm tawh tih sawiin, "India rama district tlemtê, special zone atana thlan chhuah zinga Serchhip district kan tel ve hi a vanneihthlak hle a ni," a ti.

Lalduhoma chuan, handloom hmanga eizawn-na chu lehkha thiam lote tih tura ngaihna a awm nia lang chu a dik lo tih sawiin, "Lehkha zir sang hlei hlei hian hma lain ṭan han la se, designing lamah computerise hmanga changkang zawk leh nalh zawk, Mizoram aṭanga India ram zau zawka thawn chhuah mai bakah, khawvel ram hrang hranga thawh chhuah tlak khawpa mawi leh changkang siam chhuah zel a pawimawh hle," a ti a; ṭhalaite an taimak chuan handloom industry chu eizawnna ṭha tak a ni zel dawn tih a sawi.

Serchhip leh Then-zawlah puantaha eizawng an ṭhahnem tih sawiin Lalduhoma chuan, "In tam takah puantahna kháwl ka hmuh hian tihhmasawn ngei che u ka duh a, ka phak ang tâwka ṭha leh chakin sorkarah hma kan laho dawn a, a ṭul dan azirin MLA fund aṭangin hmalakpui che u ka tum. Khawl ṭha zawk, puantahna in changtlung zawk, êng ṭha zawkte nen theihtawp kan chhuah zel dawn a ni," a ti.