BADP hmanga hnathawh tur thlirho

Mamit District Level Committee on Border Area Development Programme (BADP) chu nimin khan an chairman Vanlalngaihsaka, district bawrhsap hoin DC conference hall-ah an ṭhu a; Mamit district chhunga MLA pathum - Lalrintluanga Sailo, H Lalzirliana leh Lalrindika Ralte te pawh an tel.

Meeting-ah hian, Mamit district-a block  pathum - Zawlnuam-I, Zawlnuam-II leh West Phaileng huam chhunga BADP sum hmanga hmasawnna hna thawh tur hrang hrang ruahman, Annual Action Plan on BADP for 2019-20 thlirho a ni a; khaw kilkhawr zawkte inkalpawhna kawng siamna tura rawtna hrang hrangte chu a thuphunga pawm a ni.

Dampa bial chhunga West Phaileng - Mamit panna kawng tawi zawk, hluihlâwn tawh chu West Phaileng bial chhung leh khaw dangte tan kawng pawimawh tak a nih dawn avangin a theih ang anga thuam ṭhata chei thar leh ni se, an ti a; Dampa Tiger Reserve chu a changtlun leh zual theihna turin thawktu nghet ngeiin enkawl ni se, an ti bawk.